Klisman Preçi u vra dhe Ylli Brahimi u plagos si pasojë e një atentati që ndodhi mbrëmjen e së premtes në Milot. Teksa dy miqtë ktheheshin në banesat e tyre, poshtë pallatit i prisnin autorët që mendohet të kenë qenë të paktën 3 persona (dy që kanë qëlluar dhe shoferi).
Preçi dhe Brahimi mësohet se kishin qenë bashkë për të pirë kafe dhe në momentin që janë kthyer në sheshpushimin e një pallati u qëllua me armë zjarri në drejtim të automjetit të blinduar tip fuoristradë “Land Chrysler”. Autorët duket se e kanë ditur për makinën e blinduar dhe kanë ruajtur momentin sapo janë hapur dyert për të qëlluar. Mësohet se autorët kanë pritur të paktën 10 minuta para banesës së shënjestrave të tyre dhe i kanë ditur të gjitha lëvizjet.
Autorët duket se kanë qenë profesionistë dhe preciz në goditjen e shënjestrës së tyre. Madje ata kanë qëlluar edhe gomat e makinës së blinduar duke mos ju lënë mundësi dy miqve që të largoheshin.
Policia ka shoqëruar disa persona në lidhje me ngjarjen e mbrëmshme, të cilët mendohet se mund të kenë dijeni për ngjarjen. Sa i përket viktimës dhe të plagosurit, kjo nuk ishte hera e parë që ndaj tyre kryhej atentat.
Klisman Preçit i është bërë atentat në Maj të këtij viti në dalje të qytetit të Lezhës teksa udhëtonte me makinën Mercedes-Benz ML së bashku me kushëririn e tij Blerim Preçi. Ata u qëlluan me armë nga një makinë në lëvizje. Ai dhe kushëriri i shpëtuan paq atentatit.
Ylli Brahimit i është bërë atentat edhe në Janar të vitit 2021. Ai mbeti i plagosur në këmbë, pasi u qëllua nga dy persona që udhëtonin me motor.
Për këto dy ngjarje të para disa kohëve nuk ka autor.
Sa i përket ngjarjes së mbrëmshme, Brahimi është nën kujdesin e mjekëve në spitalin e Traumës pasi ka marrë dëmtime në brinjë dhe në këmbë.
Sipas informacioneve, atentatorët, dy persona të armatosur dhe të maskuar, kanë ndjekur objektivin e tyre duke i qëlluar në lëvizje deri sa kanë zbritur nga makina e blinduar me targa të Shkupit poshtë banesës së Preçit dhe janë larguar me shpejtësi me makinën e tyre.
Pas ngjarjes një makinë u gjetur duke u djegur në fshatin Gramëz në Krujë që besohet e u përket autorëve pasi në brendësi ka pasur dy armë kallashnikovi.
Ndërkohë ajo që e bën më të vështirë zbardhjen e kësaj ngjarje të rëndë, është fakti se kamerat e sigurisë që Ylli Brahimi, kishe montuar në banesën e tij nuk punonin.
Megjithëse zona ku ka ndodhur vrasja është e mbuluar nga kamerat e sigurisë, çuditërisht asnjëra prej tyre nuk ka punuar.
Paisja DVR rezulton të ketë qënë e fikur dhe nuk dihen arsyet se pse kamerat nuk ishin në gjëndje shërbimi.
Kjo ka sjellë në mosfilmimin e asnjë imazhi të vrasësve, të cilët janë pozicionuar në vendin ku kanë planifikuar vrasjen e dyfishtë.
Ka shumë mundësi që autorët kanë pasur dijeni për mosfunksionimin e kamerave të sigurisë, ndaj planifikimi i vrasjes është bërë pikërisht në derë të shtëpisë.
Policia thotë se për gati 5 minuta zona është përfshirë nga terrori, si pasojë e breshërive të forta të automatikëve.
Madje njëri nga autorët ka qëlluar me puthitje xhamin e blinduar të makinës, me qëllim depërtimin e plumbave në brendësi të makinës, ku ndodhej Ylli Brahimi.
g.kosovari
