Seanca gjyqësore ndaj Laert Haxhiu në Gjykatën e Posaçme kundër Korrupsionit dhe Krimit të Organizuar (GJKKO) është zhvilluar në mungesë të të pandehurit, i cili nuk është paraqitur për t’u përballur me ish-bashkëpunëtorin e tij të kthyer në të penduar.
Në sallën e gjyqit ka dëshmuar Artan Tafani, i cili konsiderohet kyç në zbërthimin e grupit kriminal të Haxhiut. Ai është marrë në pyetje nga prokurori Behar Dibra, i cili e ka thirrur në cilësinë e dëshmitarit.
Gjatë seancës, Tafani ka dhënë një dëshmi të detajuar mbi njohjen me Haxhiun dhe veprimtarinë kriminale, duke e rrëfyer në mënyrë të drejtpërdrejtë para trupit gjykues:
“Me Laertin jam njohur nga një çun nga Lushnja. Jemi takuar në Dajt nëpërmjet Lulzim Arapit, ai ma ka prezantuar. Laerti më ka thënë ‘ça di të bësh’, pasi ai kishte marrë informacion që unë kisha bërë vjedhje me dhunë. Herën e parë më ka dhënë 1 mijë euro.
Më ka kërkuar Laerti t’i vendos një sasi tritoli në një banesë në Lushnjë, në pronësi të Erjon Çoku. Për këtë ngjarje kam takuar Laertin dhe më ka thënë se çfarë duhet të bëj. Tritolin e kisha unë, ma kishte dhënë Sajmir Krasniqi. Më ka thënë Laerti 100 euro sa për lekë xhepi.
Nga Korça shkova direkt në Lushnjë dhe nga ora 2-3 e natës shkova e vendosa tritolin dhe u ktheva prapë në shtëpi. Në atë kohë flisja me Laertin dhe i thashë çfarë veprimesh bëra.
Erjon Çoku ishte një person që shiste heroinë dhe e njihja se isha përdorues. Ky i kishte marrë Laertit mallin dhe nuk i kishte dhënë lekët. Besnik Çoku është vëllai i Erjonit, rrinte jashtë shtetit. Ishte hera e parë që bëja një gjë të tillë.”
