Dëshmitari i mbrojtur nga shteti Romeo Karaj, vijoi dëshminë në gjyqin ndaj ish-administratorit të DIA-s, Kastriot Ismailaj.
Në seancën e së premtes, dëshmitari tregoi se pas marrëveshjes për mbledhjen e borxhit të debitorëve, DIA mori nga CEZ-i i atëhershëm emra debitorësh fiktivë, që nuk përfaqësonin as persona fizikë dhe as juridikë. Si përshembull, debitorë me emrin, “Pompa”, apo “Shkalla”, që ishin të paidentifikueshëm.
Sipas dëshmitarit, vlera e caktuar këtyre lloj debitorësh ishte e konsiderueshme dhe nuk dihet sesi është vepruar në terren, ndonëse janë dërguar shkresa reciproke mes DIA-s dhe CEZ-it për këtë lloj shqetësimi.
Edhe sa u përket derdhjes së shumave të mbledhura nga debitorët e energjisë, dëshmitari Romeo Karaj, rikonfirmoi edhe një herë se ato nuk hidheshin në një numër të veçantë llogarie dhe se nuk pasqyroheshin saktë paratë e mbledhura dhe uljen e debisë së personave apo subjekteve që bënin pagesa të pjesshme të borxhit.
Dëshmia e ish-juristit të DIA-s, ndërpritej herë pas here nga i pandehuri Ismailaj, i cili kundërshtonte apo i cilësonte si të pavërteta thëniet e dëshmitarit./tch/a.k
