Një gjykatë turke ka urdhëruar autoritetet për të sekuestruar të gjitha pasuritë në Turqi që i përkasin predikuesit, Fethullah Gylen, të cilin qeveria e fajëson për grushtin e shtetit të 15 korrikut, njoftoi sot agjencia zyrtare turke e lajmeve, Anadolu Agency.
Urdhri nga një gjykatë në Adana vlen për të gjitha pronat dhe llogaritë bankare që i përkasin Gylenit dhe tre aleatëve të dyshuar.
Mocioni për konfiskimin e aseteve është lëvizja e parë që pas grushtit të shtetit.
Gylen, një predikues, i lindur në Turqi dhe që jeton në mërgim në Shtetet e Bashkuara të Amerikës që nga viti 1999, i mohon akuzat kundër tij.
Kërkesa e Turqisë që SHBA-ja të ekstradojë atë ka tensionuar marrëdhëniet mes dy shteteve, por Ankaraja duhet ende të paraqesë një kërkesë zyrtare.
Uashingtoni tha se sistemi i tij gjyqësor do të peshojë meritat e rastit sapo të marrë një kërkesë ekstradimi.
Gylen dhe presidenti turk, Recep Tayyip Erdogan kanë qenë aleatë për më shumë se një dekadë, por vitet e fundit patën shkëputje për shkak të dallimeve politike.
Turqia ka pezulluar rreth 65 mijë nëpunës civilë dhe ka shfuqizuar licencat e 21 mijë mësuesve që pas grushtit të shtetit, me pretendimin se ata kanë lidhje me predikuesin.
Policia ka arrestuar 35 022 persona, nga të cilët 17 740 janë arrestuar formalisht nën urdhrat e gjykatës, që prej grushtit të shtetit.
