Gjykata Supreme e SHBA-ve hodhi poshtë të hënën kërkesën e Donald Trump për të shmangur pagesën e 5.6 milionë dollarëve ndaj ish-gazetares E. Jean Carroll, pasi një gjykatë vendosi se ai e sulmoi seksualisht atë, pengesa e fundit ligjore për Trump në betejën e tij të gjatë ligjore me Carroll.
Edhe pse Gjykata Supreme e kishte refuzuar tashmë apelin e Presidentit në qershor, avokatët e presidentit amerikan i kishin kërkuar gjykatës të rishikonte vendimin, gjë që gjyqtarët refuzuan ta bënin.
CNN thekson se nuk u regjistruan kundërshtime.
Sipas një vendimi të gjykatës më të ulët, Trump i kishte paguar tashmë Carroll 5.6 milionë dollarë. Avokatët e Carroll thanë në një dokument të paraqitur në gjykatë se Carroll “do të depozitojë shumën e kompensimit në një llogari me interes derisa kërkesa e të pandehurit për rishikim të refuzohet”.
Kujtojmë se Carroll e paditi Trumpin në vitin 2019 për shpifje. Më pas ajo e paditi përsëri në vitin 2022 për shpifje dhe dhunë fizike (incidenti kishte ndodhur në vitet 1990), pasi Shteti i Nju Jorkut miratoi një ligj që u lejonte viktimave të sulmeve seksuale të ngrinin padi civile për incidente të kaluara.
Padia e ngritur në vitin 2022 u gjykua kronologjikisht e para, me një juri që caktoi 5 milionë dollarë dëmshpërblim. Padia e vitit 2019 u gjykua më pas dhe rezultoi në një shpërblim prej 83 milionë dollarësh kundër Trumpit. Kjo çështje tani është në pritje në Gjykatën Supreme.
Trump nga ana e tij ka mohuar çdo shkelje.
