Gjykata Themelore e Prishtinës ka shpallur fajtorë 4 persona, për pjesëmarrje në një grup të organizuar kriminal dhe për kontrabandimin e migrantëve. Tre të pandehur (Salih Qitaku, Fatmir Kastrati dhe Luan Miftari) janë shpallur fajtor dhe janë dënuar me nga 4 vjet burg dhe me nga 1000 EURO dënim me gjobë, ndërsa një i pandehur (Sahit Sadriu) është dënuar me 3 vjet dhe 500 EURO gjobë, përcjell Gazeta Express.
Paneli i gjyqtarëve konstatoi se ka prova se të pandehurit kanë qenë pjesë e një grupi ndërkombëtar të organizuar kriminal, së paku prej nëntorit të vitit 2012, dhe si i tillë grupi ka mundësuar migrimin ilegal të qytetarëve të Kosovës në vendet e Evropës perëndimore.
Udhëheqësi i grupit kriminal kishte pranuar fajin dhe është dënuar më herët me një vendim tjetër me dënimin me burg në kohëzgjatje prej 4 vjet e 6 muaj burg.
