Koço Kokëdhima: PD-ja kërkon të shkatërrojë karrierën time

Deputeti socialist Koço Kokëdhima thotë se nuk ka shkelur asnjë ligj për të cilin akuzohet nga Partia Demokratike dhe se ka besim se Gjykata Kushtetuese do të vendosë drejtësi.

Në seancën e zhvilluar sot paradite, Kokëdhima u shpreh para trupit gjykues se ka vepruar në përputhje me ligjin.

“Sot jam një deputet që i kërkohet shkatërrimi i karrierës. Cenimi i mandatit është pa asnjë shkak dhe cenon të drejtat e mia”, u shpreh ligjvënësi i majtë.

“Kam ardhur në gjykatë me besimin e plote te drejtësia – vijoi ai -. Si deputet kam bërë gjithçka që më ka kërkuar ligji dhe jam në dispozicion të çdo kërkese. Shoqëritë e mia nuk kanë marrë pjesë në tenderë që kur u bëra deputet. I jam drejtuar ILDKP-së dhe Kuvendit për t’i marrë opinion, pasi kam dashur të qartësohem për çdo moment”.

Ndërkohë avokati i Kokëdhimës, Artan Hajdari, ka deklaruar se kërkesa e PD-së nuk duhet pranuar. Gjykimi i vlefshmërisë së mandatit vjen pas akuzës që Partia Demokratike ka ngritur ndaj tij për “përfitim fondesh publike”. Sipas PD-së, Kokëdhima ka përfituar në mënyrë antikushtetuese nga fondet shtetërore gjatë kohës që ishte deputet dhe për këtë arsye gjykata duhet t’ia heqë atij mandatin. Mandati i tij u dërgua në Kushtetuese pas votimit në Parlament.

Procesi

Gjykata Kushtetuese ka nisur sot paradite shyrtimin e vlefshmërisë së mandatit të deputetit të PS-së, Koço Kokëdhima. I pranishëm në këtë seancë është edhe vetë deputeti, mandati i të cilit do të kalojë në filtrin e Kushtetueses. Kokëdhima akuzohet nga PD-ja se ka përfituar fonde publike, duke pasur njëkohësisht edhe mandatin e deputetit. Ka qenë pikërisht grupi parlamentar i PD-së, ai i cili ka nismuar edhe heqjen e mandatit të Kokëdhimës. Vetë Kokëdhima I ka hedhur poshtë të gjitha akuzat e bëra ndaj tij.

Çështja kaloi në Gjykatën Kushtetuese, pas votimit në Kuvend nga ana e deputetëve të pozitës dhe të opozitës. Vetë Kokëdhima ka kontestuar votimin në Kuvend, madje në mbledhjen e grupit parlamentar të PS-së ka shfaqur rezerva ndaj kreut të deputetëve socialist, Gramoz Ruçi. Do të jetë Gjykata Kushtetuese, ajo e cila do të përcaktojë nëse Kokëdhima ka kryer apo jo shkelje dhe në varësi të kësaj do të vendosë nëse atij do ti lihet mandati i deputetit apo do ti hiqet.

(javanews.al) M. A