Prokurori i arrestuar Haxhi Giu do të mbahet në një qeli të veçantë, për t’u ruajtur nga të burgosurit e tjerë. Gjykata e Krimeve të Rënda ka kërkuar nga Drejtoria e Burgjeve që për prokurorit të ketë një ambient të veçuar nga të burgosurit e tjerë për shkak të sigurisë, raporton Dita.
Kujtojmë se Giu ka çuar prapa hekurave qindra të burgosur gjatë 23 viteve karrierë si prokuror, shumë prej të cilëve kanë marrë dënime maksimale.
Kërkesa është bërë nga gjyqtari Idriz Mulkurti, i cili ka kritikuar jo pak edhe Prokurorinë për shkak të arrestit të prokurorit. Mulkurti pretendon se ai duhet të ishte arrestuar nga oficerët e krimeve të rënda dhe jo nga reparti “Shqiponja” i policisë.
Sipas gjyqtarit, policia në kundërshtim të ligjit për të drejtat themelore të njeriut dhe prezumimit të pafajësisë si dhe në shkelje të etikës së tyre, ka publikuar pamje filmike të momentit të arrestimit.
Sipas gjyqtarit, prokuroria filmimin dhe shpërndarjen e këtyre pamjeve duhet ta ndalonte, për këtë fakt gjyqtari tha se do t’i kërkoi sqarim me shkrim titullarit të prokurorisë për krime të rënda.
Avokati mbrojtës, duke kundërshtuar masën e sigurisë “arrest me burg”, thotë se prokurori i arrestuar nuk paraqet rrezikshmëri shoqërore, ndaj i duhej dhënë një masë më e lehtë sigurie.
Avokati tha gjithashtu se klienti i tij nuk i pranon akuzat e ngritura. Prokurori është arrestuar pas përgjimeve të kryera për marrje ryshfeti për të zbutur dosjen hetimore të klientëve të tij. Rasti i regjistruar nga policia kishte të bënte me një të arrestuar për mbi 100 kg drogë, ku Prokurori kishte premtuar se do t’ia ndryshonte akuzën në “mos kallëzim” krimi me kusht që të merrte rreth 23 mijë euro.
