Me kërkesë të SPAK janë vendosur nën sekuestro pronat e ushtrisë në Sarandë me një sipërfaqe prej 30 mijë metra katror.
Vendimi i Gjykatës së Posaçme, vjen në kuadër të hetimeve gati 2-vjeçare nga kallëzimi i ish-komandati i forcave detare, Artur Meçollarit, për tjetërsimin e dhjetëra hektarë tokë të Forcave të Armatosura, duke u dhënë me qira afatgjatë, me çmime minimale, dy kompanive private.
Meçollari ka kallëzuar në SPAK një sërë zyrtarësh të lartë të për ndryshimin e planeve të ndërtimit në Bazën detare Sarandë dhe Shëngjin, pa marrë miratimin e Presidentit. Siç ka shpjeguar vetë ai, njëra padi është për shpërdorim detyre në lidhje me dhënien me qira të të gjithë bazës detare të Limionit Sarandë, duke mos lënë asnjë metër katror për forcën detare, dhe e dyta është për bazën detare të Shëngjinit, ku është ndërtuar brenda pronës që ndodhet në planin e vendosjes dhe të përhapjes të Forcës Detare, që është e ndaluar kategorikisht me ligj.
Të enjten, lidhur me hetimet e kësaj çështje ish-shefi i Shtabit të Përgjithshëm të Forcave të Armatosura, aktualisht deputet i Partisë Socialiste, Bardhyl Kollçaku dhe ish-komondati i forcave detare, Artur Meçollari u bllafaquan në SPAK për abuzimin me pronat e ushtrisë. Meçollari si kallëzues dhe Kollçaku, si person që ka mbajtur detyrën e shefit të shtabit të përgjithshëm në kohën kur janë privatizuar bazat detare.
/s.f
