Këtë të hënë të 10 tetorit në Gjykatën e Elbasanit do të mbahet seanca për ish-ministri i Brendshëm, Saimir Tahiri.
Kjo, pasi ai kërkoi që t’i njihet dënimi me shërbim prove, dhënë nga ish-Gjykata për Krime të Rënda ndërsa po vuan dënimin me 3.5 vite burg në Burgun e Lushnjës.
Do të jetë gjyqtari Elis Dine, ai i cili do të shqyrtojë kërkesën e Tahirit.
Ish-ministri argumenton se ka mbajtur kontakte me shërbimin e provës e për këtë arsye duhet të ulet dënimi.
Nëse kërkesa e tij pranohet ai përfiton ulje minimumi paktën 1.6 vite burg.
Ai po vuan dënimin prej tetë muajve në qeli, ku fillimisht u vendos burgun e Fierit ndërsa më pas u transferua në Lushnjë.
Kjo nuk është kërkesa e parë e Tahirit në lidhje me çështjen.
Në qershor të këtij viti, Gjykata e Lartë refuzoi kërkesën e Tahirit për pezullim të dënimit.
“Gjykata vendosi mospranimin e kërkesës së kërkuesit Saimir Tahiri, për pezullimin e ekzekutimit të vuajtjes së dënimit me burgim, dhënë me vendimin nr. 3 datë 04.02.2022, të Gjykatës së Posaçme të Apelit për Korrupsionin dhe Krimin e Organizuar”.
Më 22 prill, ai kërkoi nga Gjykata që të pezullonte ekzekutimin e vendimit për dënimin me burg.
Në kërkesën e drejtuar për këtë Gjykatë, Tahiri deklaroi se vuajtja e menjëhershme e dënimit me burgim mund të sjellë pasoja të rënda për vetë të pandehurin, si dhe për familjen e tij.
Kjo, për shkak të funksionit të tij si ish-ministër mund të “rrezikojë dhe mund të bëhet objekt i personazheve të krimit që ndodhen duke kryer dënimin në IEVP Fier”.
Ishte (GJKKO), e cila të premten e 4 shkurtit dënoi ish-ministrin e Brendshëm, me tre vite e katër muaj burgim, për veprën penale “Shpërdorim të Detyrës”.
Fillimisht, Tahiri u dënua me pesë vite burgim, por, për shkak të gjykimit të shkurtuar, do të vuajë tre vite e katër muaj burg.
/f.s
