Përmes të njëjtit vendim Gjykata e Posaçme dënoi me burg ish-prokurorin e Sarandës, Sali Hasa, por edhe urdhëroi lirimin e menjëhershëm të tij nga qelia.
Hasa akuzohej nga SPAK për marrje ryshfeti në këmbim të pushimit të hetimit ndaj një të akuzuari për plagosje. Gjykata e fajësoi Hasën për “korrupsion” dhe e dënoi me 3 vjet burg, dënim që u ul në 2 vjet prej gjykimit të shkurtuar.
Ish-prokurori, i shkarkuar nga vetingu teksa ishte në paraburgim, nuk do ta vuaj këtë dënim në qeli, pasi gjykata e konvertoi në 4 vjet shërbim prove dhe i dha dritë jeshile daljes së Hasës nga burgu. Por akuza e SPAK ndaj Hasës për “fshehjes e mosdeklarimit të pasurisë” nuk bindi gjykatën, e cila i dha pafajësi.
Gjykata dha dënime me burg edhe për të pandehurit e tjerë të dosjes, ku më i rëndi ishte ai me 2 vjet burg ndaj Markelian Alinanit, i cili akuzohej për “ndikim të ushtrimit të jashtëligjshëm” tek zyrtarët e Prokurorisë së Sarandës.
Për të njëjtin episod u dënuan edhe të bashkëpandehurit e tjerë:
Emiliano Mirani: 1 vit e 6 muaj
Elsiona Papa: 8 muaj
Markelian Alinani: 2 vjet
Qerim Ruçi: 1 vit e 6 muaj
Julian Zera: 8 muaj
Bledar Hajredinaj: 1 vit 6 muaj
Napolon Hodaj: 1 vit 4 muaj
Ndërsa ish-oficeri i Policisë Gjyqësorë, Napolon Hodaj, i akuzuar për shpëtimin nga akuza të një të dyshuari për “vjedhje me dhunë” dhe “plagosje” u dha një dënim përfundimtar me 1 vit e 4 muaj burg. Për dy ish-zyrtarët e drejtësisë, Hasa e Hodaj, gjykata dha si dënim plotësues heqjen e së drejtës së ushtrimit të funksioneve publike për 5 vite.
Fajtorë u shpallën edhe Elsiona Papa e Emiliano Mirani, vëlla e motër të akuzuar për aferën korruptive ndaj ish-prokurorit Hasa, si edhe Qerim Ruçi e Bledar Hajredini, të akuzuar për paracaktim të rezultatit në ndeshjen Selenica-Përmeti. Të pandehurit e dosjes u zbuluan nga një hetim i SPAK ndaj një grupi të trafikut të drogës. Mbajtja në përgjim e të dyshuarve nxori në dritë episodet e korrupsionit në Prokurorinë e Sarandës.
/a.r
