Gjykata në Dublin të Irlandës ka burgosur një shqiptar për drejtimin e një bande që kontrabandonte emigrantë të paligjshëm në Britaninë e Madhe.
Sipas asaj që shkruajnë mediat, Ndriçim Qema merrte 10 mijë Euro për çdo shqiptar që kalonte në Mbretërinë e Bashkuar përmes Irlandës. Vetë Qema kishte kërkuar azil në Irlandë, por tashmë u dënua për drejtimin e një rrjeti trafiku njerëzish. 27-vjeçari mësohet se ka shkuar në Irlandë në vitin 2018.
Sipas mediave irlandeze, fillimisht ai punoi si kontakt me bandat irlandeze dhe më pas i raportonte të atit në Shqipëri, i cili gjithnjë sipas mediave të huaja është me precedentë të mëparshëm penalë.
Qema ishte specializuar në falsifikim dokumentacionesh dhe pastrim parash. Personat që synonin të shkonin në Britani paguanin mes 5 mijë deri në 10 mijë Euro dhe merrnin dokumente false.
Si vepronte banda
Ata falsifikonin dokumentacione italiane pasi janë më të lehta për t’u falsifikuar se çdo vend tjetër në BE. Sapo personat arrinin në Dublin hidhnin dokumentet dhe aplikonin për azil.
Më pas dërgoheshin në një hotel dhe qëndronin për një ditë. Pastaj shkonte Qema që i merrte dhe i jepte një dokument tjetër fals dhe udhëtonin drejt Britanisë.
/a.r
