Policia ka zbuluar autorët e 2 vrasjeve në 2 muajt e fundit që tronditën Durrësin. Altin Ndoci i dënuar më parë për drogë dhe vjedhje makinash së bashku me një 22-vjeçar janë arrestuar për vrasjet e vëllezërve Haxhia në 27 prill dhe 2 të rinjve në 2 mars.
Burime për Dosja.al bëjnë me dije se prokuroria ka arritur të zbulojë grupin kriminal të Shkozetit, i cili me prova deri më tani është përgjegjës për vrasjen e 4 personave.
Makina Toyota u gjet e braktisur, brenda të cilës policia ka ekzaminuar gjurmë gishtash dhe njolla gjaku. Po ashtu, të njëjtat burime sqaruan se edhe në armën e krimit ka patur njolla gjaku dhe gjurmë gishtash.
Sakaq, jo të gjithë fishekët që kanë qenë në krehërin e kallashnikovit janë zbrazur. Ekspertiza balistike ka provuar se janë të njëjtat armë, që janë përdorur në këto vrasje.
Gjurmët e gishtave në armë korrespondojnë me shenjat e gishtave të Altin Ndocit, nga krahasimi nga gjurmët biometrike të sistemit të të dhënave për shtetasit shqiptarë.
Ai ka mohuar përballë hetuesve përfshirjen e tij në këto ngjarje, por dëshmia e K.A., bashkëpunëtor me të, shenjat e gishtit në armë dhe makinë, por edhe rrobat që siç mëson Dosja.al i janë sekuestruar në apartamentin e tij në Tiranë, janë pikat e forta ku bazohet akuza e prokurorisë për 33-vjeçarin.
Tashmë grupi i Shkozetit është zbuluar dhe prokuroria vijon hetimin për të zbuluar anëtarët e tjerë të bandës dhe ngjarjet kriminale ku ata janë të përfshirë. Kutia e Pandorës tashmë është hapur!
g.kosovari
