Gjatë vizitës zyrtare që Ministrja e Integrimit Europian, Klajda Gjosha, pati në Malin e Zi, zhvilloi një takim me Ministrin e Punëve të Jashtme të Malit të Zi, Igor Lukshiç.
Bashkëbiseduesit, diskutuan për marrëdhëniet shumë të mira mes dy vendeve, si një shprehje e vullnetit të fqinjësisë së mirë dhe mirëkuptimit të qartë në rajon.
Ministrja e Integrimit Europian, Klajda Gjosha u shpreh se kjo frymë bashkëpunimi i shërben aspiratës së përbashkët që kanë gjithë vendet e Ballkanit Perëndimor, për tu bërë pjesë e familjes së madhe europiane.
“Fqinjët tanë që janë përpara nesh me procesin e integrimit, mund të na ofrojnë pikërisht atë për të cilën kemi nevojë, përvojën e tyre më të mirë, në mënyrë që ne të përshpejtojmë integrimin tonë në Bashkimin Europian”, tha Ministrja Gjosha.
Ministrja Gjosha, u shpreh se mbështetja e qytetarëve shqiptarë për procesin është e madhe dhe reformat që po ndërmerren i shërbejnë rritjes së standardeve të jetesës për ta.
“Reformat sigurisht që kanë koston e tyre, por ne jemi të bindur se vetëm përmes tyre do të mund të kemi një Shqipëri më të mirë dhe më europiane”,tha Ministrja Gjosha.
Ministri i Punëve të Jashtme të Malit të Zi, shprehu gatishmërinë e vendit të tij për të ofruar praktikën, por edhe mësimet e nxjerra gjatë procesit veçanërisht me hapjen e negociatave.
“Ne jemi të gatshëm të ndajmë me ju gjithë eksperiencën tonë me me hapjen e negociatat, edhe gabimet që mund të kemi bërë, por unë besoj se në fund në këtë proces Shqipëria do të ketë përvojën e saj, të dallueshme nga e çdo vendi tjetër”,tha Ministri i Punëve të Jashtme të Malit të Zi.
Bashkëbiseduesit shprehën, dakordësinë e plotë projektet e përbashkëta në të gjitha fushat, bashkëpunimi I ngushtë rajonal çojnë përpara axhendën europiane të vendeve të Ballkanit Perëndimor.
Gjatë qëndrimit në Malin e Zi, Ministrja Gjosha, zhvilloi edhe një vizitë në Sekertariatin e përbashkët për programet bilaterale Mal i Zi –Shqipëri-Kosovë.
