Ministrja e Drejtësisë, Etilda Gjonaj, duke diskutuar mbi ecurinë e integrimit të vendit në BE, gjatë seancës parlamentare të ditës së enjte, u shpreh se vendi ynë ka realizuar të gjitha rekomandimet e dhëna nga Komisioni Europian.
“Integrimi Shqipërisë në BE është një proces i rëndësishëm që kërkon devotshmëri dhe vullnet politik për të ndërmarrë reformat e nevojshme për demokratizimin dhe zhvillimin e vendit”, tha Gjonaj në fjalën e saj.
“Kriteri politik është shumë i rëndësishëm për avancimin e procesit të anëtarësimit në BE. Qeveria dhe ministria e Drejtësisë ka kontribuar në mënyrë intensive për realizimin e rekomandimeve nga Komisioni Europian për hapjen e negociatave. Në progres raportin e 2018, Komisioni Europian kërkoi vijimin e Reformës në Drejtësi dhe ngritjen e institucioneve të reja dhe rezultatet konkrete sa i takon Vetingut. Ky rekomandim është realizuar plotësisht, pavarësisht dhe baltës që kishte shkuar deri në Gjermani, ku pata fatin të takoja disa deputet të Budenstagut në Gjermani. Ata ndiqnin të gjitha rezultatet e arritura nga Reforma në Drejtësi”, tha Gjonaj.
“Pavarësisht atyre që kanë tjerrë skenarë ogurzinj në kurriz të kësaj reforme, Reforma në Drejtësi po ecën përpara duke konfirmuar se kjo mazhorancë po kërkon të instalojë një drejtësi që nuk varet nga politika por vetëm nga paanshmëria dhe ligji. Kjo reformë e thellë në drejtësi ka nisur me pastrimin e sistemit nga gjyqtarë e prokurorë që kanë cenuar besimin e publikut te Drejtësia”, tha Gjonaj, duke folur dhe për rezultatet e deritanishme të Vetingut.
“Në një vit e gjysëm punë, janë dhënë 135 vendime nga Komisioni i Pavarur i Kualifikimit nga të cilat 51 vendime shkarkimi nga detyra e subjektit të rivlerësuar dhe në 32 raste është vendosur ndërprerja e procesit. Ky proces ka kaluar çdo pritshmëri”, theksoi Gjonaj.
“Nga ana tjetër me ngritjen e KED, KLP e KLGJ është garantuar pavarësia dhe vetëqeverisja e drejtësisë, duke lënë jashtë politikën. KLP dhe KLGJ kanë bërë gati kuadrin ligjor për ngritjen e prokurorisë special SPAK dhe BKH-së, ndërsa KED, ka nisur punë për plotësimin e vendeve vakante në Gjykatën Kushtetuese dhe Gjykatën e Lartë, si dhe emërimin e Inspektorit të Lartë të Drejtësisë dhe brenda qershorit këto institucione do të jenë gati për të vijuar punën”, tha Gjonaj
Ministrja Gjonaj tha se qeveria është angazhuar edhe në luftën ndaj korrupsionit në çdo nivel. “Janë mbi 590 masa të marra nga Task Forca Antikorrupsion, prej nga ku janë 110 zyrtarë janë përjashtuar dhe 36 zyrtarë janë dërguar për ndjekje penale. Veprimtaria koordinatorit kombëtarë kundër korrupsionit do të përqendrohet dhe në zgjatimet e administratës publike ku ofrohen shërbime ndaj qytetarëve dhe shërbimeve, për të ndaluar abuzimet në kohën parat dhe dinjitetin e qytetarëve”, theksoi ministrja Gjonaj.
“Në plotësimin e rekomandimeve të Komisionit Europian, është bërë progres i dukshëm për të drejtat e njeriut, duke nisur nga pakicat kombëtare, prona, trajtimi i të dënuarve, ndihma juridike, sistemi i të drejtës penale për të miturit…etj”, tha më tej Gjonaj.
Reforma në drejtësi, lufta ndaj korrupsionit, respektimi i të drejtave të njeriut janë njohur si arritje edhe nga partnerët tanë ndërkombëtarë që kanë përgëzuar vendin tonë për të vijuar këtë progres të bërë deri tani. Ne do vijojmë punë për të përforcuar sistemin ligjor e për të ofruar një sistem të drejtësisë siç e kërkojnë shqiptarë dhe për një shtet evropianë siç e meriton vendi ynë”, tha Gjonaj.
g.kosovari
