Një vonesë në stërvitje, qoftë edhe e vogël, mund të kushtojë nga 250 deri në 1000 euro, mungesa vlen 3000 euro. Televizioni spanjoll “Cuatro” zbuloi dje kodin e sjelljes brenda Real Madridit, duke u ndalur te gjobat për shkeljet e ndryshme. Përpikëria është ligj, kështu që te mbretërorët madrilenë i kushtohet vëmendje maksimale rregullit e disiplinës. Lista e gjobave të ndryshme nis që me mosparaqitjen 45 minuta para kohës së planifikuar për stërvitje të lojtarëve. Kjo shkelje kushton 250 euro për 5 minutat e para, pastaj 500 euro për një çerek ore, deri në 1000 euro. Mosparaqitja fare në 45 minutat para nisjes së stërvitjes gjobitet me 3000 euro.
Edhe përdorimi i telefonit është i rregulluar rreptësisht në kodin e etikës. Përdorimi i tij në shtratin e fizioterapistit është i ndaluar. Nëse e thyen këtë rregull, gjobitesh me 250 euro. Celulari ndalohet edhe në takimet e zakonshme të skuadrës, si dhe në dhomën e zhveshjes. Gjoba në këto raste varion nga 500 deri në 1000 euro. Në rast mbipeshe paguhen 250 euro, një shumë që mund të rritet në mënyrë eksponenciale, veçanërisht kur lojtarët kthehen nga pushimet dhe e kanë tepruar me ushqimin. Udhëtimet, intervistat dhe paraqitjet nëpër reklama duhet të organizohen nga klubi. Nëse në ditën e pushimit, një lojtar vendos të largohet nga Madridi, ai duhet të njoftojë Zidane më përpara.
Largimi pa adresë dhe pa leje nga kryeqyteti spanjoll gjobitet nga 250 deri në 1000 euro. Për daljet publike, të organizuara nga klubi, padyshim që ekziston një kod i rreptë i veshjes. Nëse lojtarët nuk i respektojnë pikat përkatëse, kjo iu kushton mjaft financiarisht. Gjoba ka edhe për vizitat e ndaluara në dhomat e hoteleve (në grumbullim), detyrimi për t’u paraqitur në dhomën e zhveshjes para lojërave në shtëpi, edhe pse nuk jeni grumbulluar, dhe qëndrimi në “Bernabeu” deri të paktën në minutën e 80-të ndeshjes si pritës. Më pas, lojtarët e Real Madridit mund të largohen për të shmangur trafikun./ telesport
g.kosovari
