GJKKO e la në fuqi më 12 shkurt masën ‘arrest në burg’ për kryebashkiakun Erion Veliaj, ndërsa ndryshoi masën për bashkëshorten e tij, Ajola Xoxën, nga “arrest shtëpie” në “detyrim paraqitje”.
Lidhur me këtë vendim është diskutuar edhe mbrëmjen e sotme, në emisionin ‘Studio Live’, në Report Tv më gazetarin Arbër Hitaj, ku avokati Edmond Petraj, tha se Veliajt nuk i duhej dhënë masa arrest me burg, pasi largimi i tij nga drejtimi i Bashkisë së Tiranës ka krijuar vakum.
‘Unë mendoj se mund të kishim një masë të ndryshme nga ajo që u dha, kemi të bëjmë me një personazh të rëndësishëm të drejtimit të kryeqytetit, Tirana nuk është e thjesht për t’u menaxhuar. Ky vakum që ndodh tani mendoj se gjykata dhe struktura e posaçme duhet ta kishin parë me vëmendje këtë gjë. Por do shohim ca do ndodh pasi të ndal vendimi i arsyetuar i masës së sigurisë’, tha ai.
Avokati u ndal edhe tek dosja e kryebashkiakut Erion Veliaj. Ai tha se nëse vërtetohet se prokurori Ols Dado është në konflikt interesi atëherë duhet të bëhet kerkesë për përjashtimin e tij.
‘Avokatët e Veliajt duhet që të lexojnë dosjen dhe nëse ka element nxitimi, janë ata që duhet që të veprojnë dhe për konfliktin e interesit me prokurorin duhet që të bëjnë një kërkesë për përjashtimin e tij, nëse ka konflikt interesi me prokurorin. I takon avokatëve që të reagojnë lidhur me pretendimet e klientit të tyre’, tha ai.
Lidhur me cilësimin e Veliajt në dosje si i dënuar, ai tha se ky është një skandal.
‘Nuk falet ajo, është skandal. Pse njëherë e kanë parë ata, apo janë këto procedurat copy past. Edhe kjo pjesa e protestës që u bë, mund të them se Shqipëria është një shtet i polarizuar dhe ka simpatizant që dalin për ta, i kemi parë dhe për Berishën dhe për Metën’, tha ai.
Në të njëtën linjë me Petrajn ishte edhe eksperti i Sigurisë Fatjon Softa. Ai tha se pretendimet nëse ka konflikt interesi me prokurorin duhet që të vërtetohen.
‘Veliaj është figurë qendrore e PS dhe procesi ndaj tij ka marr vëmendje edhe nga faktori ndërkombëtar, kemi një deklaratë të BE që kërkon që të mos ketë presione ndaj SPAK. Është një proces që ka nisur dhe vëmendja do të përqendrohet tek faktet dhe tek provat. Pretendimi i Veliajt që thotë që hetuesi ka marr leje ndërtimi, ky është një moment që mund të vërtetohet, por nuk besoj se gjithë hetimi është në bazën e një individi’, tha ai.
