Largimi i ministrave teknikë të Partisë Demokratike nga qeveria dhe publikimi i raportit të tyre për zgjedhjet, ka ngjallur reagime në arenën politike. Kreu i Partisë Socialdemokrate, Skënder Gjinushi, në një prononcim për gazetën “Sot”, deklaroi se ministrat teknikë të PD nga mbrojtës të zgjedhjeve u kthyen në të pangopur për tendera. Ai tha se përfshirja e teknikëve të PD në qeveri u bë thjesht për të nxjerrë Lulzim Bashën nga çadra, por më pas atyre u pëlqeu pushteti i tenderëve.
Gjinushi thotë se futja e ministrave në qeveri ishte e domosdoshme për të justifikuar ndarjen e Lulzim Bashës nga çadra, pra duhej një marrëveshje që PD të mbyllte çadrën në bulevard. “Ishte një përpjekje e dështuar për të nxjerrë Lulin nga çadra. Ishte një eksperiencë që po ta marrësh formalisht edhe mund të pranohej, por siç hodhën dorë nga mbrapa këta ministra dhe ndonjë gjë pozitive që mund të kishte, u kthye në negative. Sidomos ajo parodia që do ikim sapo të bëjmë raportin…edhe OSBE nuk e bën raportin në Shqipëri, e bën jashtë.
Nuk rri një ministër një muaj e gjysmë për të bërë raportin. Ministrat teknikë nga mbrojtës të zgjedhjeve të lira, u kthyen në të pangopur të tenderëve të lira. E nxorën nga kontrolli edhe shokun Lul. Ishte një praktikë e parregulluar me ligj e improvizuar dhe nuk mund të prodhonte veçse këtë”, u shpreh Gjinushi.
Duke u ndalur te raporti i zgjedhjeve, Gjinushi u shpreh se ministrat teknikë shkruan një raport me konstatimet e Lulzim Bashës, pa asnjë fakt konkret. Më tej, ai tha se ministrat shtynë ditët në qeveri për të përfituar nga pushteti, me justifikimin se po hartonin një raport.
“Ata shkruan një raport që ishte ajo çka përse u vunë; u vunë gjoja për të parandaluar një dy tre gjëra dhe ato që i shkroi Luli pa u bërë zgjedhjet i vunë në raport, dhe thanë që të gjitha këto që tha kryetari ynë ndodhën dhe ne s’kishim ç’bënim”, tha Gjinushi. Në raportin e publikuar nga ministrat teknikë, thuhet se votat u blenë, policia nuk e ndaloi korrupsionin, nuk u garantua vota e lirë, por nuk ka asnjë fakt konkret. Janë akuza që PD i thotë për çdo ditë.
