Kryeministri Edi Rama ka sfiduar dje Partinë Demokratike me zgjedhje të parakohshme, nëse nuk voton reformën në drejtësi. Kërkesë kjo e bërë edhe nga Pandeli Majko disa ditë më parë, që nga mediat pranë PD-së u konsiderua si një kërcënim për Ilir Metën. Por, Skënder Gjinushi thotë se ai që kërcënohet nga zgjedhjet e parakohshme është Berisha dhe opozita.
“Këto insinuata që hidhen, hidhen gjithmonë në mënyrë të parapërgatitur qëllimisht, se me këtë rast vrasim dy zogj: e zhveshim opozitën nga loja destruktive për të mos kaluar reformën, e pastrojnë opozitën nga një konflikt i madh interesi me reformën në drejtësi, se është ajo që ka baltosur, që ka deformuar e që ka çuar në këtë gjendje nivelin e drejtësisë në Shqipëri dhe është ajo që ka konflikt të madh interesi. Sepse, nëse do të fillojë të funksionojë dhe e drejtë në ndëshkimin e krimit politik, siç është 21 Janari, të penalizuarit e parë janë ata që kanë bërë edhe krimet më të mëdha”, thotë Gjinushi për Sot.
