Ministri Damian Gjiknuri i konsideroi shpifje akuzat e Sali Berishës për shitjen e naftës së Albpetrol me 20% më lirë.
Gjiknuri thotë se ankandet e shitjes së naftës bruto nga Albpetrol i përkasin periudhës kur qeveriste Berisha. Të njëjtat akuza, Berisha i përsëriti edhe në Parlament pas një statusi më herët në rrjet.
Reagimi:
Ish-kryeministri haluçinant shpif sërish dhe hedh baltë pas tastierës së kompiuterit ku kthen në tekst ëndrrat që ja tregon vetes në versionin e qytetarëve dixhital.
Ankandet e shitjes së naftës bruto nga Albpetrol, për të cilat shpif paturpësisht ish-Kryeministri, i përkasin kohës kur kompania drejtohej dhe administrohej nga qeveria e tij.
Ato ankande janë zhvilluar nga administrata e kaluar, para Tetorit 2013 dhe Albpetrol sh.a ka pasur detyrimin ligjor të zbatimit të kontratave, të cilat janë ekzekutuar gjatë periudhës Janar 2013 – Dhjetor 2014.
