Detaje të reja dalin në pah lidhur me 64-vjeçarin shqiptar, i cili është shpallur në kërkim nga Greqia për akuzën e tentativës së abuzimit seksual me një vajzë me aftësi të kufizuara.
E bija e shqiptarit, ka rrëfyer për mediat greke që ai e ka përdhunuar atë kur ishte 7 vjeçe. Rasti ka ndodhur në Shqipëri, teksa e reja shton se ka qenë e frikësuar për ta denoncuar. Pas kësaj, marrëdhënia babë e bijë nuk ka qenë më e njëjtë.
“Kur isha shtatë vjeçe, babai më përdhunoi një herë në Shqipëri, kur nuk kishte njeri në shtëpi. Nuk e denoncova kurrë, isha e frikësuar. Tanimë, nuk kam të bëj aspak me këtë njeri, u zumë shumë keq. I rikujtova kohë më parë përgjatë një grindjeje se ai kishte abuzuar seksualisht me mua dhe u përpoq të më nxirrte si të çmendur, sikur nuk dija se çfarë nxirrja nga goja”, u shpreh vajza për median greke.
E reja, shton se kur ka pasur guximin për ta denoncuar të atin, nuk pati mbështetje nga rrethi familjar, edhe pse nëna e dinte për abuzimin, siç shprehet ajo.
“Doja të denoncoja, por ngaqë më thanë që kanë kaluar vite nuk do të çonte askung dhe nuk kisha përse ta bëja. Nëna ime e dinte se çfarë po bënte ai dhe nuk bëri asgjë për këtë. Nuk dua të kem asnjë kontakt me asnjërin prej tyre. Ajo që më lëndoi më shumë ishte kur ua përmenda rastin vëllezërve dhe motrave të mia dhe ata morën anën e tyre. Që atëhere, unë i kam ndërprerë kontaktet me ata”, sqaron e reja.
Rasti i përdhunimit të 25-vjeçares në Greqi me aftësi të kufizuara
Kujtojmë, se më 21 shkurt, në Kypseli të Greqisë, 64-vjeçari shqiptar, është futur në shtëpinë e një 25-vjeçarje, e cila është me aftësi të kufizuara, duke tentuar abuzimin seksual me këtë të fundit.
Sipas mediave greke, shqiptari kishte njohje me familjen e vajzës prej 18-vitesh, madje konsiderohej si një person i besueshëm për ta.
Ka qenë nëna e 25-vjeçares, e cila ka denoncuar rastin në polici, pasi siç shprehet ajo, e gjeti autorin në shtëpinë e saj duke tentuar t’i përdhunonte vajzën.
“Shkova në farmaci për të marrë syze dhe sapo hapa derën, pashë atë mbi fëmijën tim. Ai vrapon dhe fshihet në tualet dhe unë e godas me gjëra. Më pas ai fillon të më godasë, të më shajë me fraza të pakuptueshme dhe të godasë vajzën time”, u shpreh e ëma e së resë për mediat greke.
Pas gjithë kësaj, nëna e vajzës shprehet se ka sulmuar autorin me tigan.
Në mediat greke, janë shpërndarë dhe pamjet nga kamerat e sigurisë që fiksojnë momentin kur shtetasi shqiptar hyn në shtëpinë e 25-vjeçares teksa e ëma e kësaj të fundit nuk ndodhej në banesë në ato momente.
Intervista e nënës së 25-vjeçares për Mega.gr. Në video shfaqen momentet e shkëputura nga kamerat e sigurisë lidhur me ngjarjen.
64-vjeçari është shpallur në kërkim nga autoritetet helene. Nga ekspertiza mjeko-ligjore, rezulton që nuk ka pasur abuzim tek vajza me aftësi të kufizuara.
