“Po vjen dita e së vërtetës dhe e pres me padurim sepse në Mynih jam stërvitur shumë fort për të nderuar vendin, veten dhe shqiptarët”.
Këto janë emocionet e para të boksierit Gjetan Keta menjëherë pas mbërritjes në tokën shqiptare ku do të sfidojë turkun Gokalp Ozekler për titullin interkontinental të federatës prestigjioze WBC, më 19 shkurt. Boksieri nga Bulqiza e pranon se emocionet në “Asllan Rusi” do të jenë të mëdha përpara publikut të tij.
“Për mua është kënaqësi që do të ndeshem në Shqipëri dhe t’ju jap një shembull të mirë të gjithë të rinjve shqiptarë që përmes sportit të ecin në rrugën e duhur. Së bashku do të arrijmë një fitore”.
Në vijim, Gjetan Keta u përqendrua te kundërshtari, duke e pranuar se kjo është një sfidë tjetër dhe jo e ngjashme me ato paraardhëse.
Gjetan Keta…”Kundërshtarët janë të ndryshëm dhe nuk mund të them nëse kjo është një përballje e ndryshme nga ajo e Bulqizës. Nuk dua të mendoj shumë për vështirësitë sepse jam mësuar me dyluftime dhe dua të luftoj në ring”.
Në këndvështrimin e trajnerit dhe vëllait të boksierit shqiptar, Ismail Keta kjo sfidë përbën një obligim të madh pasi zhvillohet në Tiranë. Ai shtoi se Gjetani është stëvitur shumë për të arritur suksesin, por një faktor i rëndësishëm do të jetë publiku.
“Kam këmbëngulur që ndeshjet e forta t’i zhvillojmë në Shqipëri, sepse emocionet që i dhuron publiku shqiptar, Gjetani i kthen në forcë dhe kam besim që do na nderojë, por sido që të ndodhë ky është sport”.
Në fund, Gjetani theksoi se nuk mendon aspak për emrin e kundërshtarit, duke theksuar se ky është një moment ideal për të pasi ka arritur të gjejë formën optimale për të arritur një sukses që do t’i hapte dyert drejt arenave më të mëdha të boksit profesionist.
