Fëmijët me aftësi të kufizuara dhe ata që vuajnë nga talasemia në qytetin e Lushnjes, kanë përjetuar momente të veçanta sot në Ditën Ndërkombëtare të fëmijëve, 1 Qershor.
Në orët e paradites, në Qendrën për Zhvillim, të inaguruar prej pak javësh dhe ku çdo ditë marrin shërbime fëmijët me aftësi të kufizuara, mbërritën setet e punës për 50 fëmijët e qendrës, dhuratë e Ministrisë së Zhvillimit Urban, nën kujdesin e Ministres Eglantina Gjermeni.
Për Ministren e Zhvillimit Urban ofrimi i shërbimeve për fëmijët në nevojë është i rëndësishëm dhe kërkon vëmendje të përhershme.
Ministrja Gjermeni i është bashkuar një feste të bukur dhe takimit të veçantë me fëmijët me aftësi të kufizuara, ata që vuajnë nga talasemia si dhe me prindërit, mjekët dhe edukatorët që kujdesen çdo ditë për ta.
Ministrja shoqërohej nga kryetari i bashkisë së Lushnjes, Fatos Tushe dhe stomatologia e njohur, Olesia Duka, e cila prej vitesh i është përkushtuar fëmijëve në nevojë. Në emër të grupit “Shendi Dent”, zonja Duka kishte përgatitur dhurata për të gjithë fëmijët, të cilët për disa orë kanë festuar në ceremoninë e posaçme të organizuar me animatorë dhe lojra të ndryshme.
Krahas urimit për 1 Qershorin, Ministrja Gjermeni vlerësoi rëndësinë e zhvillimit të qendrueshëm, në veçanti të brezit të ri në vendin tonë. (java/r.a)
