Pak ditë pas miratimit në Qeveri, të vendimit që i ofron zgjidhje përfundimtare problematikës së mbartur për shumë vite, për 30, 000 familje, të cilat e kanë pasur të pamundur hipotekimin e banesave të tyre, Ministrja e Zhvillimit Urban, Eglantina Gjermeni zhvilloi një takim me stafin e drejtorisë rajonale të ALUIZNI në Tiranë.
Gjatë takimit, ku drejtoresha e Tirana 2, Orjeta Myzeqari shpjegoi disa prej tipologjive të kategorive që përfitojnë nga ky vendim, Ministrja Gjermeni bëri një apel të veçantë bashkëpunimi ALUIZNI- subjekt ndërtues – qytetar- pushtet vendor.
“Vendimi ka ngjallur interesin e ndërtuesve , të cilët janë të gatshëm për të bërë legalizimin e këtyre shtesave duke ndjekur procesin konform ligjt dhe duke paguar detyrimet sipas legjislacionit në fuqi. Përgjegjësia për mbarëvajtjen e procesit është e ALUIZNI. Unë kërkoj bashkëpunimin e qytetarëve në këtë proces por edhe të subjekteve ndërtuese, të cilat duhet të plotësojnë dokumentacionin, në mënyrë që ALUIZNI t’i ndihmojë, sipas afateve që përcakton VKM.
Bashkëpunim duhet mes ALUIZNI, subjekteve ndërtuese, qytetarëve por edhe bashkive, duke dashur që të gjithë qytetarët, të cilët nuk kanë mundur të hipotekojnë apartamentet e tyre, të jenë ata që përfitojnë direkt nga ky proces legalizimi.
Gjej rastin të kërkoj angazhimin maksimal të ALUIZNI, si në Drejtorianë Qendrore, ashtu edhe në rrethe në mënyrë që tu përgjigjemi qytetarëve në afate sa më të shkurtra”, tha Ministrja Gjermeni gjatë takimit.
Drejtoresha Myzeqari, sqaroi se ALUIZNI, me hyrjen në fuqi të këtij vendimi ka detyrimin e njoftimit të ndërtuesit apo investitorit, të cilëve ju është lënë një afat prej 30 ditësh për kryerjen e procedurave të legalizimit për objektin. Në ato raste, kur ndërtuesit apo investitori nuk do t’i përgjigjet njoftimit brenda afatit të përcaktuar, atëherë i lind e drejta qytetarit të paraqesë pranë ALUIZNI kërkesën për hipotekimin e objektit që disponojnë. Nga momenti i paraqitjes së kërkesës nga qytetari e deri në përfundim të procesit të hipotekimit e gjithë praktika do të ndiqet nga vetë ALUIZNI.
Të gjithë këta qytetarë, sipas Vendimit të Këshillit të Minsitrave të miratuar më 11 janar 2017 nuk kanë asnjë detyrim financiar apo kosto shtesë për të paguar ndaj shtetit, pra e thënë ndryshe, procedura e legalizimit për qytetarët do të jetë tërësisht falas. Ndërkohë që ndërtuesit apo investitorit i lind detyrimi fiscal për pagesën e taksës së infrastrukturës për objektin e ndërtuar.
/a.m.
