Gjermania ka shprehur mbështetjen për miratimin në të gjithë Bashkimin Evropian të sistemit të asistencës për drejtimin e automjeteve të Tesla-s, duke i hapur rrugë përdorimit më të gjerë të teknologjisë në Evropë.
Drejtori ekzekutiv i Tesla-s, Elon Musk, e përshëndeti vendimin duke reaguar në platformën e tij X me fjalët “Danke schön”, pasi ministri gjerman i Transportit, Steffen Bilger, deklaroi se Berlini po mbështet një proces të shpejtë miratimi në BE.
Bilger tha se autoritetet gjermane kanë diskutuar me Tesla-n çështje teknike dhe të përgjegjësisë dhe se Gjermania është dakord që sistemi të lejojë një tejkalim të kufirit të shpejtësisë deri në 10%. Berlini pritet ta mbështesë këtë qasje edhe gjatë procesit evropian të miratimit.
Ky element ka shkaktuar debate mes rregullatorëve dhe ekspertëve të sigurisë rrugore, të cilët argumentojnë se funksioni që lejon automjetin të udhëtojë mbi shpejtësinë e përcaktuar duhet të hiqet përpara miratimit të teknologjisë.
Një tjetër çështje është emërtimi i sistemit. Tesla është ofruar ta riemërtojë teknologjinë nga “Full Self-Driving” në “Tesla Assisted Driving”, për të shmangur përshtypjen se automjetet janë plotësisht autonome. Sistemi kërkon ende që shoferi të jetë i përfshirë dhe përgjegjës për drejtimin.
“Qëllimi im është që shoferët e Teslës të jenë në gjendje të shijojnë përfitimet e drejtimit të asistuar në të gjithë BE-në pa vonesë”, tha Bilger.
