Gjermania ka arrestuar një oficer të agjencisë ushtarake të prokurimit, nën dyshimin se i ka dhënë informacione të fshehta inteligjencës ruse, njoftoi të mërkurën zyra e Prokurorisë Federale të Gjermanisë.
Shtetasi gjerman, të cilin zyra e prokurorit e identifikoi si Thomas H., i ishte afruar vazhdimisht konsullatës së Rusisë në Bon dhe Ambasadës në Berlin, nga maji me vetiniciativë dhe kishte shprehur gatishmëri për të bashkëpunuar me ta, tha zyra e prokurorit më 9 gusht.
“Prokurori federal e ka arrestuar një oficer gjerman nën dyshimin se punon për një shërbim të huaj sekret”, shkroi ministri i Drejtësisë i Gjermanisë, Marco Buschmann, në rrjetin social X.
“Urdhri i ditës është vigjilenca”, shtoi ai.
Gjermania, njëra nga vendet që i jep më së shumti pajisje ushtarake Ukrainës, është cak i madh i operacioneve ruse të spiunazhit, të cilat janë rritur dukshëm që nga pushtimi i Ukrainës nga Rusia më 2022, kanë paralajmëruar autoritetet.
Në një rast, një burrë dorëzoi informacione të siguruara gjatë punës së tij me qëllim për t’ia dërguar shërbimit inteligjent rus, theksoi zyra e prokurorit.
Ai ua arrestua në Koblenz, në zyrat e agjencisë së prokurimit në perëndim të Gjermanisë. Shtëpia dhe vendi i punës së tij u bastisën.
Me vendim të gjykatësit, ai është futur në paraburgim të mërkurën.
Zyra e prokurorit nuk ka dhënë hollësi të tjera. Ministria e Mbrojtjes e Gjermanisë nuk ka dashur të komentojë për këtë rast.
Gati 12 mijë njerëz punojnë për agjencinë e prokurimit në Gjermani, në mesin e tyre edhe rreth 1.800 ushtarë.
Në dhjetor, autoritetet e arrestuan një punëtor të Shërbimit të Jashtëm Sekret të Gjermanisë, i cili dyshohet se spiunonte për Rusinë.
