Gjergj Leka: Kam thënë vetëm të vërtetën, por kërkoj falje!
Kantautori ka kërkuar falje ndaj saj dhe Parashqevi Simakut, duke u thënë se janë bërë pjesë e diskutimeve të masës këto ditë, jo për faj të tij. Në një postim në faqen e tij në Facebook, kantautori u kërkon falje këngëtareve Parashqevi Simaku dhe Lindita Theodhori, por nuk lë pa akuzuar “të mjerët”, që iu gëzuan kësaj dite: “Më në fund, kuptova që kam miq e armiq… mjaftuan disa tituj të gabuar në një gazetë për të “zgjuar” urrejtjen që disa kanë ndaj meje dhe jo ndaj fenomenit! Edhe kur dikush thotë të vërtetën, por ama pa cenuar emra të përveçëm, janë gati plehrat dhe të paaftët që t’iu jepet mundësia të shthuren e ta ndjejnë veten fitimtarë mbi djersën e dikujt tjetër që në jetën e tij tha vetëm të vërtetën që nuk i pëlqeu askujt. Janë pikërisht ata që dështuan në jetë dhe nuk u bënë kurrë si unë! “, shkruan Leka.
Ai u kërkon falje këngëtareve duke u dhënë edhe respektet e tij. “I kërkoj falje Parashqevisë dhe Linditës që pa dashje u bënë objekt diskutimi i masës, por jo nga unë! Do ta jap përgjigjen time në ekran në datën 13 shtator dhe do flas edhe për “Të mjerët”, që duke përdhosur emrin tim e të familjes treguan sa legena e mosmirënjohës ka Shqipëria!
Respekt figurave dhe ikonave të muzikës shqiptare!”, përfundon Gjergj Leka. Në një intervistë dy ditë më parë Gjergj Leka kishte deklaruar se shumë këngëtarë shqiptarë kishin ecur në karrierë për shkak të lidhjeve intime me drejtorët e ish-Sigurimit të Shtetit. Ndër ta përmendej edhe Lindita Theodhori dhe Parashqevi Simaku.
