Danimarkë – Shqipëri, tifozët kuqezi vetëm në tribunat e përcaktuara
Përfundimisht tifozët shqiptarë që kanë blerë bileta në sektorët e rezervuar për danezët nuk do të lejohet të futen në stadiumin “Telia Parken” të Kopenhagenit për ndeshjen e 4 shtatorit Danimarkë – Shqipëri.
Në mbledhjen e fundit të mbajtur mes përfaqësuesve të “Tifozave Kuq e Zi”, policisë dhe Federatës Daneze të Futbollit (DBU), kjo e fundit ka këmbëngulur që mbështetësve shqiptarë t’u ndalohet hyrja në të gjitha pjesët e tjera të stadiumit, përveç tribunave që me rregullore i takojnë skuadrës mike.
Lajmin e ka konfirmuar vetë TKZ-ja në faqen e vet zyrtare në “Facebook”: “Pas bisedimeve dhe takimeve me DBU-në dhe policinë daneze, jemi të detyruar t’ju njoftojmë juve që keni siguruar bileta jashtë sektorit D1/D2 – sipas vendimit të DBU-së – në hyrje të stadiumit do t’u ndalohet hyrja atyre që identifikohen si tifozë shqiptarë përmes flamujve, teshave ose mënyrave të tjera”. Federata daneze ka ndarë 2150 bileta për tifozët shqiptarë.
