Një tjetër varr masiv të viktimave të luftës në Kosovë është zbuluar në fshatin Jabukë të komunës së Zubin-Potokut. Lajmi është bërë me dije nga ministri në detyrë i Punëve të Brendshme, Xhelal Sveçla. Sipas tij, zbulimi vjen vetëm pak ditë pasi në fshatin Kalludër të së njëjtës komunë u gjet një tjetër varr masiv, ku kërkimet dhe gjurmimet ende po vazhdojnë.
“Pas gjetjes së mbetjeve mortore në një varr masiv në Kalludër të Zubin-Potokut, ku ende po vazhdojnë kërkimet dhe gjurmimet, sot, vetëm 10 kilometra më tutje, në fshatin Jabukë të po kësaj komune, u gjet edhe një varr tjetër masiv me mbetje mortore të viktimave të luftës së fundit në Kosovë. Falënderoj Policinë e Kosovës, njësitë përkatëse për hetimin e krimeve të luftës, Agjencinë e Kosovës për Inteligjencë, Institutin e Mjekësisë Ligjore dhe Prokurorinë e Kosovës për punën e ndërmarrë në drejtim të hulumtimit, hetimit dhe identifikimit të këtyre lokacioneve”, shkruan në rrjetin social Facebook, Sveçla.
Në reagimin e tij, ministri akuzoi Serbinë se vazhdon të refuzojë bashkëpunimin për zbardhjen e fatit të personave të zhdukur gjatë luftës në Kosovë.
“Serbia vazhdon të mbetet e njëjta në formë dhe në përmbajtje. Ky shtet refuzon të japë informacione për personat e zhdukur me dhunë, ndërsa kërcënon dhe burgos qytetarët e saj që bashkëpunojnë për gjetjen e këtyre varreve”, deklaroi ai teksa theksoi se institucionet e Kosovës do të vazhdojnë kërkimet për zbardhjen e fatit të të gjithë personave të vrarë dhe të zhdukur gjatë luftës, si dhe për vënien para drejtësisë të përgjegjësve për krimet e luftës.
