Brohoritje dhe duartrokitje për gjashtë minuta përcollën performancën e trupës së Baletit Kombëtar të Kosovës, që interpreton edhe sot (te enjten).
Ata u ngjitën në skenë e “Theater im Palais der Kunstuniversität Graz” për të dhënë premierën e shfaqjes “Xhuljeta pa Romeon” me koreografi të Darrel Toulon.
Rreth 150 shikues u bën dëshmitar të rrëfimit që balerinët sollën në skenë. “Rrëfim i fuqishëm”, “performancë e shkëlqyer” dhe “shumë prekëse”, janë vetëm disa prej komenteve që u thanë pas shfaqjes, raporton nga Grazi gazetarja e Kohës Ditore.
Kjo është hera e dytë që Baleti Kombëtar i Kosovës performon në Graz, derisa kësaj radhe u bë pjesë e edicionit të 25-të të festivalit “Internationale Bühnewerkstatt Tanztheaterfestival”.
Ky festival i cili është themeluar në vitin 1992 si platformë për vallëzim teatri për balerinët dhe aktorët e rinj, u hap të dielën me një fragment nga shfaqja e Baletit Kombëtar të Kosovës, ku në skenë u ngjitën Teuta Krasniqi dhe Fatmir Smani, të cilët përveç hapjes edhe po mbajnë punëtori gjatë ditëve të festivalit i cili do të mbyllet me datën 16, transmeton Koha.net.
Shfaqja e baletit “Xhuljeta pa Romeon” – që pati premierën në Prishtinë në muajin qershor- kishte zënë fill qysh kur koreografi austriak Darrel Toulon kishte ardhur për të realizuar shfaqjen e parë me Baletin Kombëtar të Kosovës “Your stories, my stories”.
Kur po realizonte shfaqjen që flet për dhimbjen e luftës, trazirat, arratisjen, dëbimin e shpresën, Darrel Toulon, i kishte lindur ideja për shfaqjen e dytë.
“Xhuljeta pa Romeon” shoqërohet edhe me nëntitullin “Dashuria pret përgjithmonë” dhe është e konceptuar si homazh për personat e zhdukur në luftën e fundit në Kosovë.
Derisa në versionin e Toulonit, rrëfimi i tragjedisë më të famshme të dramaturgut anglez, William Shakespeare, shpaloset nëpërmjet një koreografie kontemporane, me tinguj muzikorë që kapërcejnë prej klasikes në muzikë akusmatike, kostume e skenografi të thjeshtë dhe interpretim plot përkushtim të balerinëve. (b.an)
