Aktori kosovar Lulzim Guhelli tashmë gjendet në Spanjë dhe ka filluar xhirimet për rolin e tij për filmin “The Chrysalis”, që është duke u realizuar me regji të Marco Lledó Escartín.
Aktori kosovar Guhelli ka njoftuar për KultPlus për xhirimet e këtij filmi që janë duke u realizuar në Spanjë, dhe po sipas tij, pjesë e këtij filmi që është i zhanrit horror janë edhe disa aktorët të tjerë shqiptarë si: Tinka Kurti, Laerti Vasili, Viktor Zhusti, Ema Andrea e Pirro Milkani.
“Xhirimet e këtij filmi janë në proces e sipër kurse premiera e këtij filmi pritet të jetë në fund të këtij viti”, ka thënë Guhelli, i cili ka shpjeguar edhe mbi rolin e tij në këtë film, ku ka detajuar se roli i tij është i një prifti, i cili quhet Athanas Bakshevani.
“Ai është një prift që aktivitetin e tij fetar e ka kryer në fshehtësi, gjatë kohës së sistemit komunist të Enver Hoxhës në Shqipëri. Përveç aktivitetit të tij si prift, ky dhe gjatë asaj kohe ka kryer ekzorcizëm në popullatë”, ka thënë ai.
