Ekspertët ndahen në mendimin pro dhe kundër nëse një zyrtar policie duhet të mbajë ose jo përgjegjësi penale, pasi në formular ka deklaruar se nuk ka përdorur aplikacione Sky Ecc, ndërkohë që SPAK ka konfirmuar të kundërtën e thënieve të tyre. Eksperti Fatjon Softa thotë se deklarimi në formular ka qenë i rremë dhe në këtë mënyrë duhet që përpos veprës penale që i faktohet gjatë hetimeve, të hetohen edhe për kallëzim të rremë, shkruan A2 CNN.
“Kjo lloj autodeklarate është një deklarim i rremë, për aq kohë sa dëshmon dhe del, dhe ne momentalisht kemi dhe të arrestuar të dyshuar që janë përfshirë në zbërthimin e këtij aplikacioni dhe në komunikime me persona të padëshiruar. Sigurisht që kjo është vepër penale dhe si e tillë do të gjykohen dhe do të dynohen edhe për këtë gjë”, shprehet eksperti Fatjon Softa.
Eksperti Faik Basha, formularin e vetëdeklarimit e cilëson si një propagandë të ministrisë dhe se oficerët e policisë nuk mund të ndiqen penalisht për atë se çfarë kanë nënshkruar aty, pasi formulari nuk ishte i ligjshëm.
“Ne patëm një rezultat mbi 11 mijë me 0 që do të thotë që ajo ishte thjesht një propagandë. Vetë nënshkrimi i kësaj deklarate nuk është vepër penale sepse nuk është ligj por është thjesht një udhëzim dhe duke deklaruar që ke nënshkruar këtë mund të marrësh një masë disiplinore. Pra, mund të shkojmë deri në një masë disiplinore tek ajo më e rënda që mund të jetë përjashtimi nga radhët e policisë, por nuk mund të kemi të bëjmë me një vepër penale nëse ky aplikacion është përdorur, por nuk është përdorur për qëllime kriminale”, thotë eksperti Faik Basha.
Basha thotë se policia dhe ministria nuk kanë asnjë kapacitet të vërtetojnë të kundërtën e thënieve të oficerëve. Ndërsa Softa propozon që efektivët e policisë duhet të ndjekin të njëjtin model si prokurorët e Spak që celularët e tyre të jenë të kontrollueshëm.
“Nuk e di nëse duhet ta bazojmë në ligj apo jo, por unë mendoj se duhet të jetë i njëjti model që është edhe për prokurorët e Spak-ut që ata bëjnë një lejojnë që telefonat e tyre të mbahen nën mbikqyrje por edhe të rrethit të tyre familjar. Gjë e cila mund të ndodhë edhe me punonjësit e policisë. E para duhet të përdorin vetëm numrat që u janë dedikuar atyre, të ndalohet dhe të gjitha rastet e përdorimit të telefonave të tjerë të konsiderohen vepër penale ose largim i tyre nga strukturat policore”, shprehet Softa.
Një javë më parë me urdhër të SPAK u arrestuan tre efektivë, mes të cilëve edhe shefat e krimeve në Lushnjë e Himarë, si dhe një tjetër u shpall në kërkim, pasi nga zbërthimi i aplikacioneve Sky Ecc akuzohen se kanë bashkëpunuar me grupet kriminale për trafikun e drogës.
