Intervistë e JAVANEWS me Sekretarin e FRD-së, Gazmend Oketa. Si e shikon ai takimin Rama-Basha dhe mungesën e dakordësimit të Reformës në Drejtësi, pse nuk po bëhet gjithashtu edhe Reforma Zgjedhore, që e mban peng zhvillimin e vendit…
Intervistoi Ben Andoni
Për Sekretarin e FRD-së, Gazmend Oketa, rezultati i takimit të dy liderave politikë ishte fare i pritshëm dhe vetë mbledhja u zhvillua që të kamuflonte qëndrimin e vërtetë të dy forcave politike. Për ish-ministrin e Mbrojtjes, takimi jo vetëm ishte i sforcuar, por edhe u përdor si pretekst për luftën boshe që bëhet prej një viti e gjysmë mes dy forcave politike. Për të mungon krejtësisht vullneti dhe nëse ai do të ishte do të kishte një lloj zgjidhje. “Nëse palët do kishin vullnetin e duhur për Reformën në Drejtësi, atëherë minimalisht paralelisht me të do të realizonin dhe Reformën Zgjedhore dhe jo ta përdornin këtë të fundit si kusht pengues për të parën. Nëse përpjekjet do të kishin qenë serioze atëherë mendoj se ky takim duhej të ishte realizuar para fillimit të punës së Komisionit të Reformës, të arrihej një marrëveshje në parim dhe në fund takimi të shërbente si një tregues se palët dinë të bien dakort dhe se besimi tek njëri-tjetri është rikthyer”, citohet ai.
Por, problemi më i madh për të gjendet te mënyra sesi konsiderohet pushteti në Shqipëri, që do të thotë hedhja poshtë e Kodit Zgjedhor të vitit 2008, “pasi Kodi aktual, listat e mbyllura dhe administrimi politik i zgjedhjeve janë faktorët që i garantojnë krerëve të forcave kryesore politike asgjësimin e çdo zëri ndryshe brenda partive dhe shndërrimin e tyre në kazerma politike. Janë të pakët shqiptarët, e aq më të pakët politikanët që do të donin t’i humbisnin të tilla mundësi për pushtet absolut”, shprehet ai.
Teksa vëzhgimi më interesant mbetet ai që thotë për elitat politike, se jo vetëm politika nuk do që ato të ndërrohen por edhe vetë populli nuk e do një gjë të tillë. “Liderat e fortë për ta janë më të rëndësishëm se një ekonomi, arsim, shëndetësi e fortë. 45 vjet komunizëm me një lider absolut, ndoshta kërkojnë edhe 45 vite të tjera për të kuptuar se ndërrimi i elitave politike nuk është fundi i botës por është një mundësi më shumë për cilindo dhe se kjo përbën thelbin e një sistemi demokratik”. Fjala të rënda, por që kanë një sens kur shprehen prej tij…
A ju duket i sforcuar takimi i dy krerëve të forcave kryesore në vend edhe pse tema kryesore është Reforma?
“Takimi ndërmjet z. Rama dhe z. Basha edhe pse zhvillohej në funksion të Reformës në Drejtësi ishte më shumë se i sforcuar dhe fakti që nuk do të kishte dakortësim ishte lehtësisht i parashikueshëm. Kjo për disa arsye: Së pari ky takim më së shumti u realizua për t’i “dëshmuar” ndërkombëtarëve se ne e “duam” Reformën por ne “nuk mundemi” ta realizojmë atë. Reforma në Drejtësi ka afro një vit e gjysmë që përdoret si çështje për të mbajtur gjallë debatin dhe luftën politike se sa si një çështje për të cilën palët kanë vullnet për ta përmbushur. Nëse palët do kishin vullnetin e duhur për Reformën në Drejtësi, atëherë minimalisht paralelisht me të do të realizonin dhe Reformën Zgjedhore dhe jo ta përdornin këtë të fundit si kusht pengues për të parën. Nëse përpjekjet do të kishin qenë serioze atëherë mendoj se ky takim duhej të ishte realizuar para fillimit të punës së Komisionit të Reformës, të arrihej një marrëveshje në parim dhe në fund takimi të shërbente si një tregues se palët dinë të bien dakord dhe se besimi tek njëri-tjetri është rikthyer”.
Në konceptin tuaj, pse mungon një vullnet për një Reformë Zgjedhore të thellë dhe të pranuar nga të dy palët?
“Mungon pasi palët do të humbnin monopolin që kanë arritur të krijojnë në politikë nëpërmjet një Kodi Zgjedhor, si ai i miratuar në vitin 2008. Kodi aktual, listat e mbyllura dhe administrimi politik i zgjedhjeve janë faktorët që i garantojnë krerëve të forcave kryesore politike asgjësimin e çdo zëri ndryshe brenda partive dhe shndërrimin e tyre në kazerma politike. Janë të pakët shqiptarët, e aq më të pakët politikanët që do të donin t’i humbisnin të tilla mundësi për pushtet absolut”.
Pse është e vështirë të ndërrojnë elitat politike në Shqipëri?
“Sepse dhe vetë shqiptarët nuk e duan një gjë të tillë. Liderat e fortë për ta janë më të rëndësishëm se një ekonomi, arsim, shëndetësi e fortë. 45 vjet komunizëm me një lider absolut, ndoshta kërkojnë edhe 45 vite të tjera për të kuptuar se ndërrimi i elitave politike nuk është fundi i botës por është një mundësi më shumë për cilindo dhe se kjo përbën thelbin e një sistemi demokratik”.
