Frika nga dëmet që mund të shkaktojë stuhia “Byron” është kaq e madhe, sa ushtria izraelite mbrëmjen e djeshme urdhëroi ushtarët të qëndrojnë në bazat e tyre dhe të mos kthehen në shtëpi për fundjavë, ka ndaluar të gjitha stërvitjet dhe ka ndaluar fjetjen jashtë, duke kufizuar lëvizjen e këmbësorëve deri në agimin e së premtes.
Gaza po pret me ankth të njëjtën stuhi, kësaj here me një mungesë të theksuar të ndihmave. Shërbimi meteorologjik parashikon përmbytje, erëra dhe bubullima në një zonë ku janë zhvendosur mijëra persona, ku nuk funksionojnë më kanalizimet dhe mbeturinat nuk mblidhen, pasi kompania përgjegjëse nuk ka më kapacitet dhe praktikisht nuk ekziston.
Stacionet e drenazhit dhe pompimit të ujërave të shiut janë jashtë përdorimit, ndërsa familjet po hapin kanale rreth çadrave në baltë për të mbrojtur veten. “Rreth çadrave tona janë formuar lumenj të vegjël, shumë prej çadrave janë fundosur”, tregon Sami, banor i Khan Yunis.
Zëdhënësi i mbrojtjes civile palestineze, Mahmoud Bassal, tha se rreth një mijë çadra janë përmbytur dhe ata vazhdojnë të marrin kërkesa ndihme që nuk arrijnë t’i përballojnë. Shumë shi parashikohet gjatë gjithë ditës së sotme dhe deri nesër.
Sipas vlerësimeve të Kombeve të Bashkuara, rreth 850 mijë persona jetojnë në 761 kampet refugjatësh, që janë më të rrezikuar nga përmbytjet. Organizatat humanitare kanë bërë thirrje ndaj Izraelit që të lejojë hyrjen e ndihmave dhe shtëpive të lëvizshme për t’u përballur me emergjencën.
Çështja vazhdon të jetë objekt përplasjeje mes autoriteteve të Jerusalemit dhe operatorëve të organizatave joqeveritare. Agjencia Associated Press, që analizoi të dhënat e Cogat, organit izraelit që mbikëqyr aktivitetet civile në Rripin e Gazës, raporton se që nga fillimi i armëpushimit dy muaj më parë, kanë hyrë më pak ndihma se sa parashikonte marrëveshja: 459 kamionë në ditë në vend të 600, ndërsa OKB-ja raporton madje 113. “Cogat insiston të mërkurën se numri i kamionëve që hynin në Gaza çdo ditë ishte mbi 600, por refuzoi të shpjegojë pse të dhënat nuk përputhen ose të japë të dhëna të papërpunuara mbi hyrjet e kamionëve”, shkruan agjencia.
Një tjetër agjenci e OKB-së, UNICEF, paralajmëron për gjendjen e kequshqyerjes së shumë fëmijëve dhe nënave në Gaza. “Në Gaza, situata është e qartë: nëna të kequshqyera lindin fëmijë të parakohshëm ose me peshë të ulët, që ndërron jetën në njësitë e terapisë intensive ose mbijetojnë, për t’u përballur më pas me kequshqyerje ose komplikacione shëndetësore”, tha zëdhënësja Tess Ingram.
Sipas UNICEF, midis korrikut dhe shtatorit, rreth 38% e grave shtatzëna të vizituara u diagnostikuan me kequshqyerje të theksuar. Në tetor, u shtruan në spital 8 mijë e 300 gra shtatzëna dhe në gjidhënie për trajtimin e kequshqyerjes së theksuar rreth 270 në ditë në një zonë ku më parë nuk kishte raste të evidentuara. Në Gaza, numri i fëmijëve që vdesin në ditën e parë të jetës është rritur me 75%.
