Gareth Bale mund të jetë duke luajtur sezonin e fundit me fanellën e Madridit.
Ka disa vite që raportohet “ky mund të jetë sezoni i fundit i Bale në Madrid” dhe vitet kalojnë, ai vazhdon ta veshë fanellën e bardhë, shkruan Gazeta Express.
Megjithatë, “ky me të vërtetë mund të jetë sezoni i fundit i 29-vjeçarit në Santiago Bernabeu, për gjithçka që po ndodh”.
Sipas gazetarit të “El Chiringuito de Jugones”, Josep Pedrerol, Bale është duke u treguar jo profesionist, duke kujtuar largimin nga stadiumi 15 minuta para fundit të ndeshjes në shtëpi me Real Sociedadin, ku Madridi humbi 2-0.
Ai edhe mbrëmë ishte shumë i zemëruar që u la në stol dhe kur hyri e shënoi gol kundër Levantes, nuk festoi, madje shtyu edhe shokët e skuadrës – ani pse ishte gol që iu dha tri pikë, për fitoren 2-1 të Realit.
Përveç kësaj, para ndeshjes, uellsiani është kapur nga kamerat e “El Chiringuito de Jugones” duke shikuar Kampionatin Botëror të Golfit, sikur nuk i interesonte fare që ekipi i tij do të luante një ndeshje të rëndësishme. Pedrerol është tallur me Bale, duke thënë se “ishte i zemëruar për shkak se në të njëjtën kohë, po luhej Kampionati Botëror i Golfit”, përcjell Express.
