Trupat e Gardës Kombëtare amerikane kanë filluar të shfaqen në rrugët e Uashington DC, një ditë pasi presidenti Donald Trump urdhëroi vendosjen e tyre në kryeqytet dhe mori kontrollin e forcave policore të qytetit, duke argumentuar se krimi i dhunshëm është jashtë kontrollit.
Mbrëmjen e së martës, automjete të blinduara u panë pranë qendrave urbane dhe pikave turistike të kryeqytetit amerikan. Sipas zyrtarëve, pritet të dislokohen 800 trupa të Gardës Kombëtare dhe 500 agjentë federalë të zbatimit të ligjit.
Kryebashkiakja demokratike Muriel Bowser, e cila mohon që krimi në qytet të jetë jashtë kontrollit, e quajti vendosjen e trupave një “shtytje autoritare”. Trump ka kërcënuar me veprime të ngjashme edhe ndaj Nju Jorkut dhe Çikagos, dy qytete të tjera nën drejtim demokrat.
Trupat me uniformë kamuflazhi kanë nisur të hyjnë në kryeqytet që pas njoftimit të Trump-it të hënën, duke ngritur barrikada pranë disa ndërtesave qeveritare dhe madje duke pozuar për foto me turistët.
Sipas zëdhënëses së Shtëpisë së Bardhë, Karoline Leavitt, 23 persona u arrestuan të hënën në mbrëmje nga agjentët federalë, për akuza që përfshijnë vrasje, shkelje me armë, tregti droge, akte të turpshme, ngacmim, drejtim të rrezikshëm dhe vepra të tjera penale. Ajo paralajmëroi: “Kjo është vetëm fillimi… gjatë muajit të ardhshëm administrata Trump do të ndjekë dhe arrestojë çdo kriminel të dhunshëm në Distrikt që shkel ligjin”. Drejtori i FBI-së, Kash Patel, tha se agjentët e FBI-së kanë qenë të përfshirë në rreth gjysmën e arrestimeve.
Megjithëse kryebashkiakja dhe shefja e policisë së qytetit, Pamela Smith, thanë më herët se ndajnë të njëjtin objektiv me agjentët federalë për të larguar armët e paligjshme nga rrugët, Bowser ashpërsoi tonet gjatë një takimi me qytetarët në mbrëmje, duke u bërë thirrje banorëve të “mbrojnë qytetin, autonominë dhe vetëqeverisjen” dhe të votojnë një Dhomë të Përfaqësuesve me shumicë demokrate si “mburojë ndaj kësaj shtytjeje autoritare”.
Vendosja e trupave erdhi ndërsa policia nisi një operacion kërkimi për një person të armatosur që vrau një burrë të hënën në mbrëmje në lagjen Logan Circle, vetëm një milje nga Shtëpia e Bardhë. Viktima ishte vrasja e 100-të e regjistruar këtë vit në Uashington DC.
Sipas të dhënave të policisë metropolitane, krimet e dhunshme arritën kulmin në vitin 2023 dhe ranë me 35% vitin e kaluar, duke shënuar nivelin më të ulët në tre dekada. Megjithatë, kryetari i Unionit të Policisë së DC, Gregg Pemberton, ka akuzuar autoritetet se “falsifikojnë qëllimisht shifrat për të krijuar një narrativë të rreme të uljes së krimit”. Të dhënat e FBI-së tregojnë gjithashtu një rënie më të moderuar, prej 9%, por studimet sugjerojnë se norma e vrasjeve në kryeqytet mbetet mbi mesataren e qyteteve të mëdha amerikane.
