Pasditen e djeshme parkingu i Komisariatit Rrugor të Tiranës të ngjante më shumë me ato panairet e makinave luksoze, që fillonin nga “Ferrari”, “Porche Panamera”, “Audi”, “Mercedez”, etj.
Ngjyra që mbizotëron është e kuqja. Duket se pronarët e mjeteve të shtrenja, nuk ishin kursyer as për të “blerë” targat e bukura, si: “111”, “333” apo “555”, targa që në Tiranë etiketohen si targa të të fortëve.
Arsyeja e bllokimit të tyre është e njëjtë, xhironin gomat nëpër qytet, duke shkaktuar jo vetëm zhurma të bezdisshme për qytetarët, por duke u kthyer edhe në rrezik evident për jetën e kalimtarëve, për shkak të shpejtësisë së lartë.
Burime nga Policia e Tiranës thanë se prej dy ditës, Komisariati i Qarkullimit ka vënë në zbatim një plan masash për bllokimin e automjeteve debitorë, atyre që nuk respektojnë vijat e bardha, si dhe të makinave që lëvizin me shpejtësi dhe shkaktojnë shqetësime tek qytetarët. “Policia Rrugore e Tiranës, ka hartuar një plan masash me objekt kryesor ndëshkimin e drejtuesve të automjeteve që shkelin dispozitat e parashikuara në nenet 139 paragrafi 5,(gara në shpejtësi), neni 189 paragrafi 1 (dhënie përparësi këmbësorëve), si dhe për nenin 203 paragrafi 1 (mjete debitore).
Në zbatim të këtij plani janë konstatuar dhe proceduar drejtues automjetesh, ndërsa janë bllokuar në total 174 makina.
Ndër mjetet e bllokuara janë edhe disa automjete të fundit, luksoze, të cilat janë konstatuar me shkelje si për gara sportive dhe si debitorë”, thonë burimet nga Policia e Tiranës.
