Procesi i votimit për Bashkinë e Kolonjës ka përfunduar zyrtarisht dhe tashmë pritet nisja e procesit të numërimit.
KQZ njofton se pjesëmarrja në këto zgjedhje ishte 49.6%, teksa për të votuar u thirrën rreth 16 mijë qytetarë. Në KZAZ kanë mbërritur edhe kutitë e para. Po pritet mbërritja e gjithë kutive për nisjen e procesit të numërimit.
Gara mes dy kandidatëve, Ilia Stefo (ASHE) dhe Dritan Hajros (PAA-PD) nuk ka kaluar pa incidente. Rreth orëve të mesditës, djali i kryetares së PS-së në Barmash është goditur me sende të forta nga disa persona ende të paidentifikuar.
Më herët procesi është ndërprerë në QV 4048/1 pasi pati një përplasje mes komisionerit të PD dhe vëzhguesit të PS.
Deklarata e KQZ:
Komisioni Qendror i Zgjedhjeve informon se në orën 18.00 ka përfunduar procesi i votimit.
Sipas të dhënave të përcjella nga QV-të në Qendrën e të Dhënave në KQZ, pjesëmarrja në votimet për zgjedhjet për Kryetarin e Bashkisë së Kolonjës, rezulton si më poshtë:
(Tabela DTI)
Komisioni Qendror i Zgjedhjeve vlerëson se procesi i votimi ka qenë i qetë dhe se në asnjë nga 36 qendrat e votimit nuk ka munguar asnjë nga elementët që parashikon Kodi Zgjedhor si bazë materiale zgjedhore.
Bashkëpunimi i komisionerëve të Qendrave të Votimit me KQZ-në, duke komunikuar në kohë reale dhe korrekte për të përcjellë të gjithë dinamikën e procesit të votimit, solli informimin korrekt dhe të saktë të opinionit publik.
Aktualisht, komisionerët e Qendrave të Votimit po dorëzojnë materialet zgjedhore nga QV-të në Komisionin e Zonës së Administrimit Zgjedhor nr. 73, ku ndodhet edhe Vendi i Numërimit të Votave.
KZAZ-ja ka emëruar anëtarët e grupeve të numërimit që do të numërojnë fletët e votimit dhe Administrata e KQZ-së do t’i trajnojë ata, ndaj ju bëjmë thirrje që të marrin pjesë në trajnim, sepse trajnimi i tyre është faktor kyç në mbarëvajtjen e procesit të numërimit të votave.
Procesi i numërimi i votave duhet të fillojë mënjherë sapo baza materiale të jetë dorëzuar nga të gjithë Qendrat e Votimit në VNV, dhe në zbatim të dispozitave të Kodit Zgjedhor, numërimi duhet të vijojë pa ndërprerje./java/a.k
