Kandidati për postin e Avokatit të Popullit, Skënder Haluci, thotë se PD dhe PS kanë bërë një marrëveshje të fshehtë për të zgjedhur në këtë krye të këtij institucioni Endri Shabanin.
“E ka bërë Partia Socialiste domosdoshmërish, duke përdorë edhe elementë të ndryshëm të grupit parlamentar të Partisë Demokratike”, tha Haluci në një intervistë në Puls nga Bruna Çifligu në A2 CNN. “Mua më ka ndodhur më ka ndodhur që ca deputetë, që kanë vite që njihem me ta, më kanë thënë se nuk ta firmosi dot pa e pyetur Doktor Profesor Sali Berishën. Unë kurrë nuk arrij ta pranoj që Sali Berisha ka thënë mos e firmosni Skënder Halucin, firmosni Endri Shabanin”.
Haluci shtoi se kreu i PD, Berisha, është jashtë kësaj marrëveshjeje. “Kanë përdorur emrin e Sali Berishës. Më kanë thënë disa deputetë që nuk i kam në listën e mbështetësve se nuk ta jap dot firmën pa pyetur”.
Ai tha se opozita tërhoqi firmat pasi kuptoi se dikush, ndonjë bashkëpunëtor i partisë brenda grupit i ka përdorur.
