Bashkia e Tiranës njofton se krahas rikonstruksionit dhe lyerjes së fasadave, ndërmarrja që merret me dekorin në Bashkinë e Tiranës po tregon një kujdes edhe për pikturimin me vepra arti të të gjitha gabinave të telefonisë apo elektrike që ndodhen nëpër rrugët e kryqëzimet e Tiranës.
Kryetar i Bashkisë së Tiranës, Erion Veliaj ka publikuar disa nga fotot që tregojnë punonjësit e bashkisë teksa pikturojnë në rrugët e Tiranës, duke i përdorur ato edhe si një kartolinë urimi për një ditë të mbarë për të gjithë qytetarët.
“Mirëmëngjesi, frutat nuk i gjeni vetëm te Pazari i Ri”, shkruan Veliaj teksa komenton jo pa humor një nga pikturat e realizuara. “Faleminderit kolegët e dekorit! Tirana jonë çdo ditë më e bukur për fëmijët dhe të rriturit që ende ruajnë kuriozitetin e çiltërsinë e fëmijëve”, shkruan Veliaj në rrjetin social facebook duke shoqëruar një tjetër set fotografish nga punimet artistike që po kryejnë punonjësit e dekorit në rrugët e Tiranës. /b.d
