Në vijim të takimeve elektorale, lideri demokrat Lulzim Basha propozoi dhe premtoi sot vendosjen e tabelave për dyqanet, të cilat paguajnë taksat e Bashkisë. Por, në fakt kjo deklaratë ka qenë edhe gafa e radhës e kryetarit të PD.
Që prej janarit, të gjitha dyqanet në Tiranë kanë nisur zbatimin e këtij rregulli të vendosur nga kryebashkiaku Veliaj, por mesa duket Basha ende nuk i di nismat që zbatohen në kryeqytet.
Përmes një postimi në Twitter, kryebashkiaku Erion Veliaj i ka kujtuar paraardhësit të tij që të zgjohet nga gjumi, pasi gjërat kanë ndryshuar brenda një kohe të shkurtër që kur Basha la karrigen e kryetarit të Bashkisë së Tiranës.
“PD propozon vendosje tabele për dyqanet që paguajnë taksat! Lul, zgjohu plako se e kemi bërë këtë në Tiranë që në Janar“, shkruan Veliaj. Një fakt i tillë konfirmohet edhe nga kjo foto e realizuar në një nga dyqanet e Tiranës, ku nisma ka marrë jetë./ma.me
