Parlamenti i ri do të ketë dy fytyra. Një PS e re, me një PD të vjetër. Eksperimenti i Ramës për të sjellë fytyra të reja, doli i suksesshëm. Ai zgjodhi spastrimin, kurse Berisha riciklimin.
Fytyra e PD në parlamentin e ri, nis me Sali Berishën dhe Tritan Shehun, të vjetër në politikë, po aq sa demokracia në Shqipëri.
Nga 50 deputetë të koalicionit, demokratët kanë vetëm 42. 36 dolën nga lista e mbyllur. Por mbi 50% e tyre thjesht do të marrin pushimet e verës, e do të rikthehen në karriget e njëjta. Janë të vjetër, disa të zhurmshëm e disa memecë, por i lidh vetëm diçka, Berisha.
5 janë rikthime. U mendua se e kishin mbyllur me parlamentin e politikën. Por jo, Berishës i duhen aty. Nga djali i Fahri Balliut, tek Gent Strazimiri, zonja e hekurt Jozefina Topalli, Bardh Spahia apo Igli Cara. Pas një mungese disa vjeçare do jenë sërish në sallë.
Në parlament, demokratët do të shohin për herë të parë 13 deputetë të rinj, por jo dhe aq në moshë.
Kjo listë, vjen me Arian Ndojën dhe Gjin Gjonin, ish-magjistratët e drejtësisë së vjetër, që do të përfaqësojnë fytyrën e re të PD në parlament. Shtuar këtu edhe kandidaten e fisit Çapja, Klodianën e Elbasanit.
Kurse nga forumi rinor, ka vetëm një, kryetari Besart Xhaferri. Të tjerët, janë Eno Bozdo apo Ivi Kaso, të vjetër në PD, por fati i keq që Lulzim Basha nuk i gostiti kurrë me një karrige. Kohët kanë ndryshuar, tani kanë doktorin.
Të tjerët, janë emra të padëgjuar, por PD gjithmonë surprizon me anonimët, sidomos me batutat e humorin.
Por kësaj radhe, Berisha nuk mori mësim as nga aleatët e tij. Ilir Meta nuk pranoi mandatin që do i siguronte lirinë, për të pasur në parlament 4 deputetë, Erisa Xhixhon, të rikthyerin Edmond Haxhinasto dhe dy të rinj, Tedi Blushin e Brunilda Haxhiun. Ndërsa Agron Duka la karrigen për Artan Lukun.
Edhe ata që i quan opozita e opozitës, Agron Shehaj me një parti të re, arriti të marrë një karrige të vjetër por nxori edhe një deputet të ri. Po ashtu edhe Adriatik Lapaj i Shqipëria Bëhet dhe Redi Muçi i Lëvizjes Bashkë. I vetmi që beson se ndryshimi vjen pa ndryshim, është Sali Berisha.
