Në finalizim të operacionit të koduar “Saga”, policia e Durrësit sekuestroi 30 kallëpë me lëndë plasëse eksploziv dhe kaspolla detonatore me fitil zjarr përcjellës, duke vënë në pranga 4 persona.
Vjollca Sorra 42 vjeçe, banuese në Burrel, Edmond Demiri 32 vjeç, banues në Burrel, Robert Doku 30 vjeç, banues në Burrel dhe Viktor Hanaj 33 vjeç, po ashtu banues në Burrel u vunë në pranga e policisë nën akuzën e trafikimit të lëndëve plasëse.
Policia sqaron se në bazë të informacioneve që dispononin Specialistët e Trafiqeve gjatë kontrollit të ushtruar në çantat e shtetasve të mësipërm, i’u gjetën dhe sekuestruan në cilësinë e provave materiale:
• 30 kallëpë e dyshuar si lëndë plasëse eksploziv me peshë rreth 6 kg;
• 29 copë kapsolla detonatore ku 13 prej tyre ishin të përgatitura me fitil zjarrpërcjellës;
• 4 aparatë telefoni celular;
•një mjet tip Benz.
Materialet i kaluan Prokurorisë së Rrethit Gjyqësor Krujë për veprime të mëtejshme për veprën penale”Trafikimi i lëndëve plasëse, djegëse, helmuese dhe radioaktive” në bashkëpunim parashikuar në nenin 282/ a , 25 të Kodit Penal./Express
