Ministria e Mirëqënies Sociale do të kontrollojë shpërndarjen e asistencës sociale dhe transfertave për shtresat në nevojë nëse janë përdorur për qëllime politike. Ministrja Xhulieta Kërtusha ka urdhëruar ngritjen e një grupi të posaçëm pune për kontrollin e veprimtarisë së kryer nga Zyrat e Ndihmës Ekonomike në të gjithë vendin.
Përmes një njoftimi zyrtar, ministria njoftoi se urdhëri është marëë pas një numri të konsiderueshëm denoncimesh të ardhura nga vetë qytetarët, ku pretendohet se ndihma ekonomike dhe pagesat sociale janë përdorur për të blerë vota.
Sipas njoftimit, grupi i punës do të verifikojë në mënyrë të hollësishme çdo rast të denoncuar. Por vec rasteve specifike, ministria do të kontrollojë zyrat e ndihmës ekonomike, nëse kanë respektuar kriteret ligjore në dhënien e ndihmës.
Për nëpunësit, të cilat do të konstatohet se kanë përfshirë në skemë familjet, të cilat nuk plotësojnë kriteret për të përfituar asistencë do të ketë masa ndëshkuese, të parashikuara nga ligji. Paralelisht, në njoftim ministria i bën thirrje qytetarëve që të denoncojnë cdo rast të përfshirjes në fushatë të punonjësve në varësi të saj.
Auditimi i zyrave të ndihmës ekonomike është masa e radhës që njoftohet nga ministrat teknikë të emëruar nga opozita sipas marrëveshjes politike rama basha. Më parë, ministrat që përfaqësojnë opozitën kanë urdhëruar kufizimin e lejeve vjetore për administratën si dhe kanë shkarkuar apo kallëzuar penalisht një numër jo të vogël nëpunësish publike për përfshirje në fushatën elektorale.
a.ç
