Me urdhër të Prokurorit të Përgjithshëm Adriatik Llalla është shkarkuar nga detyra Prokurori i Fierit Artjan Bejo. Mësohet se shkak për këtë është bërë zvarritja e proceseve hetimore nga prokurori i Fierit.
Në zyrën e Llallës vetëm një ditë më parë ka mbërritur propozimi për shkarkimin e Bejos nga Këshilli i Prokurorëve i cili pak ditë më parë ka marrë në shqyrtim një sërë ankesash të mbërritura nga qytetarët.
Nga diskutimet dhe verifikimet e kryera nga Këshilli i Prokurorisë ka rezultuar se janë mbi 300 dosje dhe kallëzime të shtetasve të cilat flenë në zyrën e prokurorit dhe për më tepër se sa 1 vit ato nuk kanë asnjë përgjigje apo veprim hetimor.
Po ashtu mësohet se janë propozuar dhe 7 transferime prokurorësh, ku 4 prej tyre janë me ulje në detyrë për shkak të zvarritjes së hetimeve. Masa pritet të merren shumë shpejt dhe për një drejtues prokurorie, i cili ka rezultuar me shkelje gjatë ushtrimit të detyrës.
