Partia Demokratike nuk është shkëputur dot nga konfliktualiteti as në mbledhjen e parë të Këshillit të ri Bashkiak të Tiranës, ku Erion Veliaj morri dhe detyrën e kryebashkiakut. Këshilltarët e djathtë nuk ka respektuar solemnitetin e kësaj mbledhje të parë dhe janë larguar prej saj në mënyrë demonstrative duke kërkuar largimin nga salla të ministrit të Pushtetit Vendor, Blendi Çuçi.
Sapo kryetari i Bashkisë Erion Veliaj ka hyrë në sallën e këshillit për të bërë betimin, kreu i grupit të këshilltarëve të djathtë, Leonard Olli ka kërkuar fjalën duke kërkuar nga kryetari i ri i Këshillit Bashkiak që mbledhja të vazhdonte pa pjesëmarrjen e ministrit Çuçi.
“Mos e prishni këtë moment. Na lini të jemi pjesë e kësaj ceremonie, por jo me pjesëmarrjen e njerëzve që nuk kanë tagrin për të qenë të pranishëm”, – tha Olli. Por kryetari i Këshillit Bashkiak, Aldrin Dalipi, ka kërkuar nga përfaqësuesit demokrat që të respektojnë mbledhjen duke u shprehur në të njëjtën kohë se mbledhja e Këshillit Bashkiak është hapur për këdo. “Mbledhjet e Këshillit Bashkiak janë të hapura për këdo qytetar të Tiranës”, – u shpreh Dalipi.
Më pas përfaqësuesit e djathtë u larguan nga salla. Në fakt kjo kërkesë e këshilltarëve të PD-së për Bashkinë Tiranë, vjen në kundërshtim me qëndrimin që kanë mbajtur këshilltarët e kësaj force në të gjitha njësitë e tjera, ku Çuci ka qenë pjesëmarrës thuajse në konstituimet e të gjitha këshillave bashkiak.
