Punët në “Call Center” janë tashmë streha e shumë të rinjve që mbarojnë shkollën e lartë dhe ky është një fakt. Megjithatë, jo të pakta kanë qenë rastet kur këto kompani, në shumicën e rasteve të huaja, kanë shkelur marrëdhëniet e punës.
Monitorimi dhe kontrolli i fundit është bërë nga Zyra e Komisionerit për të Drejtën e Informimit dhe Mbrojtjen e të Dhënave Personale e cila ka kryer një sërë verifikimesh të subjekteve tregtare me objekt veprimtarie në sektorin “Call Center”.
Nga verifikimi i kryer ka rezultuar se nga 278 subjekte që operojnë aktulaisht në vendin tonë 17 prej tyre kanë qenë me shkelje të detyrimit ligjor për të njoftuar Zyrën e Komisionerit në lidhje me përpunimin e të dhënave personale. Në këtë kuadër është marrë vendimi për sanksion administrativ-gjobë për 17 subjekte tregtare, të cilët iu nënshtruan procedurës së hetimit administrativ.
Siç theksohet nga kjo këto subjekte, kanë detyrimin ligjor për të njoftuar Zyrën e Komisionerit në lidhje me të dhënat personale që përpunojnë.
Ky monitorim është realizuar gjatë periudhës mars-prill 2015, ndërsa ato janë kryer në zbatim të marrëveshjes së bashkëpunimit me Autoritetin homolog në Republikën e Italisë, dokument i nënshkruar në muajin shkurt të këtij viti.
