Një seri ortekësh vdekjeprurës kanë shkaktuar një bilanc tragjik në Alpet Austriake, ku tetë skiatorë humbën jetën brenda vetëm një dite, pavarësisht paralajmërimeve të vazhdueshme për rrezik të lartë.
Tre skiatorë nga Republika Çeke u vranë në Austrinë qendrore, pasi një ortek goditi një grup prej shtatë personash në rajonin Murtal të Styria-s, njoftoi policia. Viktimat u varrosën plotësisht nga bora. Ekipet e shpëtimit arritën t’i lokalizonin dhe t’i nxirrnin, por autoritetet konfirmuan se, pavarësisht përpjekjeve, ata u gjetën pa shenja jete.
Më herët gjatë së shtunës, në rajonin Pongau pranë Salzburgut, një tjetër ortek rrëmbeu shtatë skiatorë jashtë piste, duke shkaktuar vdekjen e katër personave dhe plagosjen e një të pesti, raportoi transmetuesi publik austriak ÖRF.
Në të njëjtën zonë, një skiatore u varros nga bora bashkë me bashkëshortin e saj pas një orteku tjetër. Shërbimet e emergjencës, të njoftuara nga bashkëshorti, nuk arritën ta shpëtonin gruan.
“Pavarësisht paralajmërimeve të qarta dhe të përsëritura, sot patëm disa ortekë me pasoja fatale”, deklaroi Gerhard Kremser, kreu i shërbimeve të emergjencës në malin Pongau. Sipas tij, ngjarjet tregojnë seriozitetin ekstrem të situatës aktuale të ortekëve.
Tragjeditë në Alpet Austriake pasojnë një sërë incidentesh të ngjashme ditët e fundit. Të martën, një djalë 13-vjeçar nga Republika Çeke humbi jetën në një ortek në Bad Gastein, ndërsa ndodhej jashtë piste në vendpushimin e skive Sportgastein. Të dielën e kaluar, një skiator 58-vjeçar u vra në një ortek në Werberg, Tirol.
Ndërkohë, rreziku i ortekëve ka shkaktuar viktima edhe në vende të tjera alpine. Gjatë së njëjtës fundjavë, gjashtë persona humbën jetën në Alpet Franceze, ndërsa në pjesën zvicerane të Alpeve një skiator gjerman u vra dhe katër të tjerë u plagosën.
