Edhe kjo fundjavë duket se do të dominohet nga temperatura tepër të nxehta në territorin shqiptar ku vlerat maksimale do të arrijnë deri në 37°C.
E shtuna dhe e diela pritet të ndikohen nga masa ajrore të qëndrueshme. Moti do të jetë i kthjellët me vranësira të pakta kalimtare në orët e mesditës përgjatë relieveve malore.
Dita e sotme do të ketë një rritje të temperaturave në vlerat maksimale të cilat pritet të kapin vlerat deri në 36-37°C. Për ditën e diel moti pritet të jetë përsëri i kthjellët por nuk do të mungojnë edhe vranësirat kalimtare përgjatë orëve të mesditës.
Temperaturat në orët e mëngjesit pritet të pësojnë një rritje prej 3-4 gradë ndërsa ato të mesditës do të jenë në pothuajse të njejta vlera me ato të ditës së shtunë, duke përjashtuar një rënie të lehtë në zonën e veriut.
