Frederik Ndoci ka ndjekur rrugën e këngëtarit Gjergj Leka, duke folur për koleget në kohën e diktaturës. Në një intervistë të publikuar sot në gazetën Panorama, Ndoci ka folur për Parashqevi Simakun, duke thënë se ajo ishte e afërt dhe e privilegjuar me drejtorin e përgjithshëm të RTSH në vitet ’80, Marash Hajati. Këngëtari nuk ka folur hapur, duke lënë më tepër të nënkuptohet. Teksa flet për një çmim të parë të mohuar në festival, për shkak se vinte nga rehabilitimi, Ndoci thotë: “Parashqevia ishte femër simpatike, sex appeal, bukuroshe dhe tashmë është marrë vesh nga media se çfarë përflitej për të, për jetën e saj private. Marash Hajati e kishte më afër Parashqevinë se sa këngëtarët e tjerë, e donte më shumë atë dhe e privilegjonte më tepër. Arsyen pse ishte kështu, nuk e di”.
I pyetur nëse Simaku ishte vërtet e privilegjuar, Ndoci pohon.
“Po, ishte më e privilegjuar se të tjerët. Nuk i di arsyet e privilegjeve të saj, por po marr shembuj konkretë. Irma Libohova ka qenë shumë e mirë. Myfarete Laze ka qenë shumë e mirë. Parashqevi Simaku nuk ka qenë më e mirë sesa këto të dyja”.
Për sa i përket çmimit të humbur, Frederik Ndoci sqaron se “në bazë të letrave, e kisha fituar unë. Në bazë të preferencave të drejtorit e kishte fituar Parashqevia, edhe pse ajo kishte sërish shumë letra, por ishin nja 70 letra më pak se unë. Ndërsa Anita Bitri ishte shumë, shumë larg me letra se sa ne të dy. Ishte një mijë zarfe më pak sesa ne”.
Panorama
